Toshkent viloyati Bekobod shahrida 22-may kuni odam o‘limi bilan bog‘liq yo‘l-transport hodisasi sodir bo‘ldi. Bu haqda Yo‘l harakati xavfsizligi xizmati xabar qildi.
Qayd etilishicha, holat shu kuni soat 12:40 larda Bekobod shahri “Madaniyat” mahallasi hududidan o‘tgan 4P-26 Sirdaryo—Dehqonobod—Bekobod avtomobil yo‘lining 99-kilometrida yuz bergan. Haydovchi J.G. (1985-yilda tug‘ilgan) “VAZ-2104” avtomobilida o‘zidan oldinda bo‘lgan transportni quvib o‘tish maqsadida qarama-qarshi harakatlanish uchun mo‘ljallangan tomonga chiqqan. Shu vaqtda ro‘parasidan kelayotgan haydovchi O.I. (1986-yilda tug‘ilgan) boshqaruvida bo‘lgan Cobalt avtomobili bilan to‘qnashgan.
YTH oqibatida “VAZ-2104” avtomobili haydovchisi J.G. va Cobalt avtomobilida bo‘lgan yo‘lovchi S.A. (2022-yilda tug‘ilgan) og‘ir tan jarohatlari olib voqea joyida vafot etgan. Shuningdek, Cobalt haydovchisi O.I. va ushbu avtomobil yo‘lovchisi N.I. (1961-yilda tug‘ilgan) hamda “VAZ-2104” yo‘lovchisi A.S. (2013-yilda tug‘ilgan) tan jarohati olib shifoxonaga yotqizilgan.
Holat yuzasidan Bekobod shahar IIB huzuridagi tergov bo‘limi tomonidan dastlabki tergov harakatlari olib borilmoqda.
Izoh (0)