Қарши аэропортининг аэровокзал комплексида реконструкция ишлари бошланди, деб хабар беради Транспорт вазирлиги матбуот хизмати.
Маълум қилинишича, дастлабки босқичда ташриф буюрувчилар учун мўлжалланган зал кенгайтирилиб, аэровокзалнинг йўловчилар ўтказувчанлик қобилиятини соатига 200 йўловчидан 400 нафар йўловчига ошириш режалаштирилган.
Шунингдек, аэровокзалнинг иккинчи қавати жўнаб кетувчи йўловчилар учун мўлжаллаб қайта реконструкция қилинади. Бунинг натижасида комплексдаги йўловчиларни рўйхатдан ўтказиш устунлари сони ҳозирги 3 дан 10 тага оширилади.
Шу билан бирга замонавий багаж тақсимловчи ленталар, электрон тарозилар ва йўловчилар учун қулайликлар яратишга мўлжалланган бошқа мосламалар ўрнатилади.
Эслатиб ўтамиз, 18 март куни аэропорт мажмуасининг тантанали очилиш маросими бўлиб ўтган эди. Янги терминал қуриш лойиҳаси Air Marakanda ва давлат ҳамкори Uzbekistan Airports ўртасида Ўзбекистон авиация тарихидаги биринчи давлат-хусусий шериклик келишуви доирасида амалга оширилган.
Янги терминал режалаштирилган рейслар сонини ҳафтасига 40 тадан 120 тагача ошириш имконини берган, перроннинг модернизация қилиниши эса самолётлар тўхташ жойлари сонини 24 тага етказган. Uzbekistan Airports бошқарув кенгаши раиси Раъно Жўраевага кўра, мазкур лойиҳа умумий ҳисобда 150 миллион долларга тушган.
Изоҳ (0)