Қирғизистоннинг Иссиқкўл вилоятида Асман келажак шаҳрини қуриш режалаштирилмоқда, деб ёзади Asia-Plus. «Асман экологик тоза келажак шаҳри», тақдимотда айтилганидек, мамлакатнинг иқтисодий ва сайёҳлик марказига айланиши кўзда тутилган. У ерда ярим миллион одам истиқомат қилиши режалаштирилган.
Мамлакат президенти ҳузуридаги Инвестициялар агентлиги директори Равшанбек Собиров маълум қилишича, шаҳар қурилиши назарда тутилган ҳудуд биосфера зонасига киради.
«Шу сабабли биз майдонни 10 километрга силжитишга қарор қилдик. Энди у Тўру-Айғир овули ва Томчидаги аэропорт оралиғида жойлашди. Бу аэропортга 10—12 километрга яқинроқ», — дея аниқлик киритди мансабдор.
Асман келажак шаҳри майдони аввалгидек 4 минг гектарни ташкил этади. Инвесторларни жалб қилиш бўйича музокаралар давом этмоқда.
Танланган ҳудуд биосфера зонасига кириши сабабли у ерда шаҳарни қуриш мумкин эмаслиги ҳақида активистлар бир неча ой аввалроқ гапирган эди.
Иссиқкўлда экологик тоза Асман шаҳрини бунёд қилиш президент Садир Жапаровнинг орзуси бўлиб, уни ҳукумат яқин 5 йил ичида амалга оширмоқчи.
Вазирлар маҳкамаси раиси Акилбек Жапаров 15 февраль куни бўлиб ўтган матбуот анжуманида ҳукумат янги шаҳарнинг бош режасини ишлаб чиқаётгани, сув ва электр энергияси билан таъминлаш манбаларини қидираётганини маълум қилганди.
Лойиҳанинг тахминий қиймати 20 миллиард долларни ташкил этади. Аввалроқ Франция компанияси Асман инвесторига айланиши айтилганди.
Иссиқкўл соҳили яқинида 4 минг гектар ҳудудда қуриладиган шаҳар шакли қуш парвози баландлигидан қўбиз — қирғиз миллий мусиқа асбобини эслатади. У ерда илғор таълим тизими жорий этилиши, замонавий соғломлаштириш ва бизнес марказлари, стадионлар қурилиши, юқори технологиялар парклари, молия-кредит муассасалари бўлиши кўзда тутилган.
Ишлаб чиқариш инфратузилмаси муқобил энергия манбалари, ресурслардан оптимал фойдаланиш, экологик тоза транспорт турларини ишлатиш, шунингдек, яшил иқтисодиёт тамойилларига риоя қилишни назарда тутувчи «ақлли шаҳар» синфидаги юқори технологик ишланмаларга асосланади.
Мавзуга доир:
Изоҳ (0)