Farg‘ona viloyatining Quvasoy shahrida ozodlikni cheklash jazosiga hukm qilingan ayol IIB xodimini haqorat qilgani yuzasidan jinoyat ishi qo‘zg‘atildi, deb xabar beradi viloyat IIB axborot xizmati.
Ma’lum qilinishicha, 16-aprel kuni soat 21:00 larda Quvasoy shahar “Hamid Olimjon” MFY, Sarbazor ko‘chasi hududida profilaktika inspektori sud hukmi bilan 4 yil 2 oy 8 kun ozodlikni cheklash jazosiga hukm qilingan Y.D ismli ayolning maqsadsiz yurganini aniqlab, ushbu holatni belgilangan tartibda rasmiylashtirmoqchi bo‘lgan.
Fuqaro Y.D sodir etgan jinoyati uchun jazo o‘tab kelayotgan bo‘lsa-da, o‘ziga tegishli xulosa chiqarmasdan, sud tomonidan unga belgilangan sutkaning soat 19:00 dan 06:00 ga qadar u yoki bu sabab bilan yashash joyini tark etishi haqidagi talabini buzib, yashash joyini tark etgan.
Ushbu holatni aniqlagan profilaktika inspektori o‘z xizmat burchini bajarayotgan vaqtida ayol uning qonuniy faoliyatiga qarshilik ko‘rsatib, ko‘pchilik fuqarolar oldida sha’ni va qadr-qimmatini beodoblik bilan qasddan tahqirlagan.
Mazkur holat yuzasidan Quvasoy shahar prokuraturasi tomonidan Jinoyat kodeksining 140-moddasi 3-qismi “a” bandi (haqorat qilish) bilan jinoyat ishi qo‘zg‘atilgan.
Avvalroq Samarqandda IIB xodimi pogonini o‘zi yulib, bunda yonidagi ayolni ayblagani ko‘ringan video tarqalgandi.
Izoh (0)