Фарғона вилоятининг Қувасой шаҳрида озодликни чеклаш жазосига ҳукм қилинган аёл ИИБ ходимини ҳақорат қилгани юзасидан жиноят иши қўзғатилди, деб хабар беради вилоят ИИБ ахборот хизмати.
Маълум қилинишича, 16 апрель куни соат 21:00 ларда Қувасой шаҳар «Ҳамид Олимжон» МФЙ, Сарбазор кўчаси ҳудудида профилактика инспектори суд ҳукми билан 4 йил 2 ой 8 кун озодликни чеклаш жазосига ҳукм қилинган Ю.Д исмли аёлнинг мақсадсиз юрганини аниқлаб, ушбу ҳолатни белгиланган тартибда расмийлаштирмоқчи бўлган.
Фуқаро Ю.Д содир этган жинояти учун жазо ўтаб келаётган бўлса-да, ўзига тегишли хулоса чиқармасдан, суд томонидан унга белгиланган сутканинг соат 19:00 дан 06:00 га қадар у ёки бу сабаб билан яшаш жойини тарк этиши ҳақидаги талабини бузиб, яшаш жойини тарк этган.
Ушбу ҳолатни аниқлаган профилактика инспектори ўз хизмат бурчини бажараётган вақтида аёл унинг қонуний фаолиятига қаршилик кўрсатиб, кўпчилик фуқаролар олдида шаъни ва қадр-қимматини беодоблик билан қасддан таҳқирлаган.
Мазкур ҳолат юзасидан Қувасой шаҳар прокуратураси томонидан Жиноят кодексининг 140-моддаси 3-қисми «а» банди (ҳақорат қилиш) билан жиноят иши қўзғатилган.
Аввалроқ Самарқандда ИИБ ходими погонини ўзи юлиб, бунда ёнидаги аёлни айблагани кўринган видео тарқалганди.
Изоҳ (0)