Sog‘liqni saqlash vazirining tegishli buyrug‘iga asosan “O‘zmedimpeks” davlat unitar korxonasi direktori Diyorxon Kattaxo‘jayev egallab turgan lavozimidan ozod etildi. Bu haqda SSV matbuot kotibi xabar berdi.
Ta’kidlanishicha, u xizmat faoliyatida yo‘l qo‘ygan xato va kamchiliklari hamda tizimda davlat xaridlarini amalga oshirishdagi sustkashligi uchun ishdan olingan. Shuningdek, Sog‘liqni saqlash vazirligining Dori vositalari, tibbiy buyumlar va jihozlar muomalasini tartibga solish hamda muruvvat yordamini muvofiqlashtirish boshqarmasi mas’ul xodimi ham egallab turgan vazifasidan ozod etilgan.
Eslatib o‘tamiz, 2019-yilda “O‘zmedimpeks” shifoxonalarga yaroqliligi sentabrda tugaydigan 7 milliard so‘mlik 107 mingta aerozol tarqatgandi. Bosh prokuror Nig‘matilla Yo‘ldoshev o‘rganishlar davomida bu doriga yillik haqiqiy ehtiyoj 430 tani tashkil etishini ma’lum qilgan edi.
Izoh (0)