Davlat xavfsizlik xizmatining Namangan viloyati bo‘yicha boshqarmasi xodimlari tomonidan o‘tkazilgan tezkor-qidiruv tadbirlari natijasida internet tarmog‘i orqali aqidaparastlik g‘oyalari singdirilgan materiallarni tarqatish bilan shug‘ullangan shaxs faoliyatiga chek qo‘yildi, deb xabar beradi O‘zA.
Xususan, Namangan shahrida yashovchi 23 yoshli fuqaro J.A. Telegram messenjeri orqali Rossiyada ishlaydigan Shuhrat ismli shaxs bilan tanishib, diniy mavzularda o‘zaro yozishmalarni amalga oshirgan. Yangi tanishi esa unga xalqaro terroristik tashkilotlar va diniy ekstremistik oqimlarning g‘oyaviy rahnamolari bo‘lgan Abu-Saloh, Abdulloh Zufar, Sodiq Samarqandiy va boshqalarning audio, videoma’ruzalarini yubora boshlagan.
Natijada J.A. Telegram messenjerida kanal ochib, uning a’zolariga aqidaparastlik g‘oyalari bilan yo‘g‘rilgan elektron kitoblar, foto, audio, videomateriallarni targ‘ib qilgan.
Tergovga qadar tekshiruv harakatlari davomida J.A. huquq-tartibot idoralariga chaqirtirilib, uning mobil aloqa vositasi tekshirib ko‘rish maqsadida olib qolingan. So‘ngra J.A. eski telefoni orqali Shuhrat bilan bog‘lanib, bo‘lgan voqeani aytganida, Shuhrat huquqni muhofaza qiluvchi organ xodimlari uni qo‘lga olishi mumkinligini aytib, zudlik bilan Qozog‘istonga chiqib ketishi kerakligini bildirgan. Shundan keyin J.A. Toshkent viloyatiga borib, “G‘ishtko‘prik” xalqaro o‘tkazish punktidan Qozog‘istonga o‘tishni reja qilgan. Ammo xorijga chiqish pasporti yo‘qligi bois uning rejasi amalga oshmay qolgan.
Shundan keyin u Shuhrat bilan qayta bog‘lanib, undan Farg‘ona viloyatining Quva tumaniga borish hamda u yerdan aylanma yo‘llar orqali Qirg‘izistonga o‘tib ketish topshirig‘ini olgan. Shuningdek, Shuhrat unga Qirg‘izistonga chiqish yo‘llarini ham o‘rgatgan. Natijada J.A. o‘zbek—qirg‘iz davlat chegarasini noqonuniy kesib o‘tishga uringan vaqtida qo‘lga olingan.
Vazirlar Mahkamasi huzuridagi Din ishlari bo‘yicha qo‘mita xulosasiga ko‘ra, J.A. tomonidan Telegram messenjeri orqali tarqatilgan materiallardagi ma’lumotlar aqidaparastlik g‘oyalari bilan yo‘g‘rilgan bo‘lib, ularni O‘zbekiston hududiga olib kirish, tayyorlash va tarqatish taqiqlanadi.
Uning sodir etgan noqonuniy xatti-harakatlariga huquqiy baho berildi va jinoyat ishlari bo‘yicha Namangan shahar sudi tomonidan J.A.ga nisbatan 4 yil muddatga ozodlikdan mahrum qilish jazosi tayinlandi.
Avvalroq Qashqadaryoda Suriyaga ketmoqchi bo‘lgan 24 yoshli shaxs ushlangani, Surxondaryoda Facebook orqali aqidaparastlik g‘oyalarini targ‘ib qilgan shaxs ushlangani, Sirdaryoda xalqaro terroristik tashkilotga a’zoligi uchun qamalgan mahkum qamoqxonadan turib ekstremistik guruh tuzgani, Toshkent shahri va Toshkent viloyatida ekstremistik tashkilotlarga aloqador 24 nafar shaxs qo‘lga olingani to‘g‘risida xabar berilgandi.
Izoh (0)