Давлат хавфсизлик хизматининг Наманган вилояти бўйича бошқармаси ходимлари томонидан ўтказилган тезкор-қидирув тадбирлари натижасида интернет тармоғи орқали ақидапарастлик ғоялари сингдирилган материалларни тарқатиш билан шуғулланган шахс фаолиятига чек қўйилди, деб хабар беради ЎзА.
Хусусан, Наманган шаҳрида яшовчи 23 ёшли фуқаро Ж.А. Telegram мессенжери орқали Россияда ишлайдиган Шуҳрат исмли шахс билан танишиб, диний мавзуларда ўзаро ёзишмаларни амалга оширган. Янги таниши эса унга халқаро террористик ташкилотлар ва диний экстремистик оқимларнинг ғоявий раҳнамолари бўлган Абу-Салоҳ, Абдуллоҳ Зуфар, Содиқ Самарқандий ва бошқаларнинг аудио, видеомаърузаларини юбора бошлаган.
Натижада Ж.А. Telegram мессенжерида канал очиб, унинг аъзоларига ақидапарастлик ғоялари билан йўғрилган электрон китоблар, фото, аудио, видеоматериалларни тарғиб қилган.
Терговга қадар текширув ҳаракатлари давомида Ж.А. ҳуқуқ-тартибот идораларига чақиртирилиб, унинг мобил алоқа воситаси текшириб кўриш мақсадида олиб қолинган. Сўнгра Ж.А. эски телефони орқали Шуҳрат билан боғланиб, бўлган воқеани айтганида, Шуҳрат ҳуқуқни муҳофаза қилувчи орган ходимлари уни қўлга олиши мумкинлигини айтиб, зудлик билан Қозоғистонга чиқиб кетиши кераклигини билдирган. Шундан кейин Ж.А. Тошкент вилоятига бориб, «Ғишткўприк» халқаро ўтказиш пунктидан Қозоғистонга ўтишни режа қилган. Аммо хорижга чиқиш паспорти йўқлиги боис унинг режаси амалга ошмай қолган.
Шундан кейин у Шуҳрат билан қайта боғланиб, ундан Фарғона вилоятининг Қува туманига бориш ҳамда у ердан айланма йўллар орқали Қирғизистонга ўтиб кетиш топшириғини олган. Шунингдек, Шуҳрат унга Қирғизистонга чиқиш йўлларини ҳам ўргатган. Натижада Ж.А. ўзбек—қирғиз давлат чегарасини ноқонуний кесиб ўтишга уринган вақтида қўлга олинган.
Вазирлар Маҳкамаси ҳузуридаги Дин ишлари бўйича қўмита хулосасига кўра, Ж.А. томонидан Telegram мессенжери орқали тарқатилган материаллардаги маълумотлар ақидапарастлик ғоялари билан йўғрилган бўлиб, уларни Ўзбекистон ҳудудига олиб кириш, тайёрлаш ва тарқатиш тақиқланади.
Унинг содир этган ноқонуний хатти-ҳаракатларига ҳуқуқий баҳо берилди ва жиноят ишлари бўйича Наманган шаҳар суди томонидан Ж.А.га нисбатан 4 йил муддатга озодликдан маҳрум қилиш жазоси тайинланди.
Аввалроқ Қашқадарёда Сурияга кетмоқчи бўлган 24 ёшли шахс ушлангани, Сурхондарёда Facebook орқали ақидапарастлик ғояларини тарғиб қилган шахс ушлангани, Сирдарёда халқаро террористик ташкилотга аъзолиги учун қамалган маҳкум қамоқхонадан туриб экстремистик гуруҳ тузгани, Тошкент шаҳри ва Тошкент вилоятида экстремистик ташкилотларга алоқадор 24 нафар шахс қўлга олингани тўғрисида хабар берилганди.
Изоҳ (0)