“G‘alla erkinlashtirilishi narxlarning keskin oshishiga olib kelmaydi” — Iqtisodiy taraqqiyot va kambag‘allikni qisqartirish vazirligi

G‘alla erkinlashtirilishi narxlarning keskin oshishiga olib kelmaydi. Bu haqda Iqtisodiy taraqqiyot va kambag‘allikni qisqartirish vazirligi boshqarma boshlig‘i Akrom Mo‘minov “Daryo” muxbiri bilan suhbatda aytib o‘tdi.

Uning aytishicha, qishloq xo‘jaligi sohasidagi islohotlarning navbatdagi bosqichi — g‘alla bozorini erkinlashtirish bilan boshlandi.

Bunday sharoitda ichki bozorda un va non narxlari qanchalik o‘zgaradi degan savol ko‘pchilikda bor. Ushbu sharoitda bir narsani aniq aytish mumkinki, ichki bozorimizdagi 70-80 foiz narx bozor narxlarida shakllangan narxlar. Biz g‘allaning narxini erkinlashtirsak ham, erkinlashtirmasak ham talab va taklif asosida shakllangan narx. G‘alla erkinlashtirilishi narxlarning keskin oshishiga olib kelmaydi.

Ikkinchi masala bor, bu asosan Toshkent shahri va hududlarda iste’mol qilinadigan qolipli non narxi bo‘yicha. Qolipli non narxi hozir ham erkinlashtirilgan. Biz davlat tomonidan qat’iy narx belgilash amaliyotidan voz kechganmiz. Bozor islohotlarini amalga oshirishda bu narsalarga chek qo‘yilgan. Agar non narxida o‘sish kuzatilgan taqdirda ham tegishli vazirlik va idoralar tomonidan bunday holatda aholini ijtimoiy himoyaga muhtoj qismini qanday himoya qilamiz, degan mexanizmlari ustida ishlayapmiz. Bu bo‘yicha alohida me’yoriy hujjat loyihalari tayyorlanyapti. Biz haqiqatda bozor islohotlarini joriy qilmoqchi bo‘lsak qaysidir narxni davlat tomonidan belgilash amaliyotidan to‘liq voz kechishimiz kerak. Biz bozor islohotlarini xohlayapmizmi, demak hamma islohotlar aniq bozor mexanizmlari — talab, taklif, raqobat asosida shakllanishi kerak. Non narxlarini o‘zgarishlarini salbiy oqibatlarini kamaytirish bo‘yicha aniq mexanizmlar ishlab chiqiladi.

Akrom Mo‘minov, Iqtisodiy taraqqiyot va kambag‘allikni qisqartirish vazirligi boshqarma boshlig‘i