Meta Platforms Inc. O‘zbekistonda Meta Pay tovar belgisini ro‘yxatdan o‘tkazishga ariza berdi. Bu boradagi tegishli ma’lumot Adliya vazirligi huzuridagi Intellektual mulk agentligi bazasida paydo bo‘ldi, deb xabar beradi Spot.
Facebook, Instagram va WhatsApp’ni boshqaruvchi kompaniya 16-may kuni ariza bergan. Unda quyidagi faoliyat turlari ko‘rsatib o‘tilgan:
- onlayn to‘lovlar hamda tovar va xizmatlarni sotib olish uchun yuklab olinadigan dasturiy ta’minot, elektron moliyaviy platforma;
- moliyaviy xizmatlar, elektron kartalar bilan tranzaksiyalarni qayta ishlash;
- tranzaksiyalar va onlayn-o‘tkazmalar, jumladan, kriptovalyutalarni qayta ishlovchi dasturiy ta’minotni taqdim etish.
Meta’ning moliyaviy texnologiya yo‘nalishi rahbari Stefan Kazrielning ma’lum qilishicha, Meta Pay foydalanuvchilar uchun “yagona hamyon”ga aylanadi. Uning yordamida kompaniyaning kelajakdagi metaolamiga oid raqamli predmetlar bo‘yicha hisob-kitoblarni amalga oshirish mumkin bo‘ladi.
Bundan tashqari, servis muallif va bizneslarga mijozlarga xizmat ko‘rsatish bo‘yicha yordam ko‘rsatishni va’da qilmoqda. Kazrielning so‘zlariga ko‘ra, Meta “har kimga jahon moliyaviy tizimidan foydalanish” imkoniyatini taqdim etishni o‘z missiyasi deb hisoblaydi, bu “moliyaviy inklyuzivlikka erishishni tezlashtiradi”.
Eslatib o‘tamiz, 2021-yilning oktabrida Facebook kompaniyasining nomi Meta’ga o‘zgargandi. Mark Sukerberg The Verge’ga bergan intervyusida loyiha muvaffaqiyatli amalga oshsa, yaqin besh yil ichida kompaniya faoliyati ijtimoiy tarmoqlarga bog‘lanib qolmasligi va aynan metaolamga aloqador bo‘lishini qayd etgan edi.
Izoh (0)