O‘zbekistonda birinchi chorakda banklar tomonidan qariyb 700 mlrd so‘mlik soliq to‘langan
O‘zbekistonda 2022-yilning ilk choragida banklar tomonidan budjetga 680,5 mlrd so‘m miqdorida soliq to‘langan. Bu haqda “Piamg.uz” xabar bermoqda.
Yirik soliq to‘lovchi banklar uchligida quyidagi davlat banklari o‘rin olgan:
- O‘zSQB — 130,2 mlrd.so‘m;
- “O‘zmilliybank” — 126,0 mlrd so‘m;
- “Ipoteka bank” — 113,5 mlrd so‘m.
2022-yil 1-aprel holatiga ko‘ra, O‘zbekistonda 33 ta bank tashkiloti, shu jumladan, 12 tasi davlat ulushiga ega banklar faoliyat yuritmoqda.
O‘tgan yilning mos davridan farqli o‘laroq, tarmoq ko‘rsatkichlari sezilarli darajada yaxshilandi. Butun tarmoq bo‘yicha foiz va foizsiz daromadlari 47,1 foizga o‘sdi. Sof foyda esa 2 trln so‘mdan ortiqni tashkil etdi. Bu o‘tgan yilning ilk choragiga nisbatan 36,6 foizga ko‘pdir.
Aktivlar
Bank sektori aktivlarining umumiy hajmi 2021-yilning 1-choragiga nisbatan 21,1 foizga oshib, 449,2 trln so‘mga yetdi.
Eng yuqori aktivlar ko‘rsatkichi bo‘lgan banklar:
- “O‘zmilliybank” ATB – 93,1 trln so‘m (+18.7 foiz);
- “O‘zbekiston sanoat – qurilish banki” ATB – 55,9 trln so‘m (+15.9 foiz);
- “Asaka bank” ATB - 51,9 trln so‘mni (+8.8 foiz).
Eng ko‘p sof foyda “O‘zsanoatqurilishbank” oldi – 319,2 milliard so‘m. Ikkinchi o‘rinda “Ipoteka bank” (309,1 mlrd so‘m), uchinchi o‘rinda“O‘zmilliybank” (276 mlrd so‘m) joylashgan.
“Qishloq Qurilish Bank” 154,3 mlrd so‘m bilan to‘rtinchi, InfinBank esa 145 mlrd so‘m bilan beshinchi o‘rinni egalladi.
Shuningdek, birinchi o‘ntalikda yana beshta bank o‘rin olgan:
- “Kapitalbank” – 141 mlrd so‘m;
- “Ipak yo‘li” bank – 129,5 mlrd so‘m;
- “Hamkorbank” – 129 mlrd so‘m;
- Trastbank – 128 mlrd so‘m;
- Oriyent Finans Bank – 81 mlrd.
