Aprel oyida O‘zbekistonda avtomobillarga bo‘lgan talab birlamchi bozorda yana jadal o‘sa boshladi. Bu haqda Iqtisodiy tadqiqotlar va islohotlar markazi “Daryo”ga ma’lum qildi.
Ayni paytda ikkilamchi bozorda avtomobillarni rasmiylashtirish uchun yig‘imlarning bekor qilinishi ta’sirlari davom etmoqda.
2022-yil aprel oyida 129,1 ming dona avtotransport vositalari davlat ro‘yxatidan o‘tkazildi va bu o‘tgan yilning aprel oyiga nisbatan 63,3 mingga yoki 104 foizga ko‘proq.
Shu bilan birga, joriy yilning mart oyiga nisbatan sotuvlar hajmi 15,1 foizga ko‘paygan.
2022-yil 1-yanvardan boshlab ikkilamchi bozordan sotib olingan avtomobillarni davlat ro‘yxatidan o‘tkazish narxi pasaytirildi va ushbu o‘zgarishlarning ta’siri aprel oyida ham davom etdi.
Ikkilamchi bozor
2021-yilda ikkilamchi bozorda bir oyda o‘rtacha 40 ming dona avtotransport vositalari sotilgan bo‘lsa, joriy yil aprel oyida ushbu ko‘rsatkich 96,9 ming donani tashkil etdi.
Raqamlar yanvar oyida 85,3 ming donaga, fevral oyida 101 ming donaga, mart oyida 84,7 ming donaga yetgan edi.
Birlamchi bozor
Birlamchi bozorda sotib olingan avtomobillar soni 32,1 ming donani tashkil etib, mart oyiga (27,5 ming) nisbatan 16,9 foizga ko‘paydi. 2021-yil aprel oyiga (21,3 ming) nisbatan avtomobil savdosi 51 foizga oshdi.
Mart oyi bilan taqqoslaganda yangi avtomobillar savdosida sezilarli darajada o‘sish Namangan (77 foiz), Qashqadaryo (38 foiz), Toshkent (37 foiz) viloyatlarida kuzatildi. Samarqand (-4 foiz) viloyatida pasayish qayd etildi.
Avvalroq mart oyida mahalliy avtomobillar oldi-sotdisi bo‘yicha oxirgi 14 oy ichida rekord qayd etilgani haqida xabar berilgan edi.
Izoh (0)