2022-yilning aprel oyi yakunlari bo‘yicha yillik inflyatsiya darajasi 10,4 foizni, oziq-ovqat mahsulotlari inflyatsiyasi esa 13,4 foizni tashkil etdi. Bu haqda Markaziy bankning sharhidan ma’lum bo‘ldi.
Bunda, iste’mol tovarlari narxlarining o‘zgarishi aholining turli daromadli guruhlariga turlicha qiymatga ega bo‘ldi.
Aprel oyida barcha daromad guruhlarida oziq-ovqat mahsulotlari narxlarining o‘sishi sekinlashgani kuzatildi. Bu ayrim asosiy turdagi meva va sabzavotlarning yangi hosili chiqishi hisobiga narxlarning mavsumiy pasayishi bilan izohlanadi.
Oziq-ovqat inflyatsiyasi o‘sishining sekinlashgani, ayniqsa, nisbatan kam daromadli (2 – 4 mln so‘mgacha) guruhlar uchun inflyatsiyaning sezilarli pasayishiga sabab bo‘ldi.
5 mln so‘mdan yuqori daromad qiluvchi aholi uchun nooziq-ovqat mahsulotlari inflyatsiyasi 13,3 foiz bo‘ldi. Bu o‘tgan oyga nisbatan 2,6 foizga ko‘proqdir. Ularga oziq-ovqat inflyatsiyasi 7,9 foiz bo‘lgan bo‘lsa, xizmatlar sohasida bu ko‘rsatkich 7,1 foiz bo‘lgan.
2 mln so‘mgacha daromad qiluvchi aholi 14,5 foizlik oziq-ovqat inflyatsiyasiga uchragan. Bu esa mart oyiga nisbatan 1,2 foizga kamdir. Ularda nooziq-ovqat va xizmatlar sohasida inflyatsiya mos ravishda 8,3 foiz va 6,5 foiz bo‘lgan.
Shu tariqa 2 mln so‘mgacha maosh oluvchilar 5 mln so‘mdan yuqori oylik oladigan aholiga nisbatan oziq-ovqat inflyatsiyasini qariyb 2 barobar ko‘proq sezgan
Tashqi omillar, logistika va import bilan bog‘liq masalalar hisobiga barcha daromad guruhlarida nooziq-ovqat tovarlari narxi yuqoriroq shakllandi.
Aprel oyida ijtimoiy tovarlar narxlari o‘sishi o‘tgan oyga nisbatan (yillik hisobda) 11,8 foizgacha sekinlashgan bo‘lib, bunda, umumiy inflyatsiya bilan farq 1,4 foizgacha qisqardi.
Shu o‘rinda, ijtimoiy tovarlar narxlarining o‘sishi sekinlashishini o‘simlik yog‘lari (kungaboqar va paxta yog‘i), kartoshka va tuxum narxlarining yillik hisobda pasayishi bilan izohlash mumkin.
Avvalroq O‘zbekistonda aprel oyida narxlar qanday o‘zgargani haqida xabar berilgan edi.