Avvalroq jahon bozori hamda mintaqaviy birjalar narxlari tahlil qilinib, 1 tonna g‘alla hosili uchun kutilayotgan minimal narx 3 mln so‘m bo‘lishi e’lon qilingan edi.
G‘alla tayyorlashga ixtisoslashgan barcha qishloq xo‘jaligi mahsulotlari ishlab chiqaruvchilarni birjada ro‘yxatdan o‘tkazilishini tashkil etish, ularni savdoga o‘rgatish va brokerlar biriktirish kerak, deb yozadi Qishloq xo‘jaligi vazirligi.
Shuningdek, 1-avgustga qadar 20 ta g‘alla korxonasidagi davlat ulushlarini sotish topshirilgan.
Bu haqda O‘zbekiston prezidenti raisligida mamlakatimizda g‘allachilik muammolariga bag‘ishlangan kechagi yig‘ilishda ma’lum qilindi.
Bozorga yo‘naltirilgan agrar tarmoqni rivojlantirish uchun ahamiyatli bo‘lgan uchrashuvdan asosiy tezislari:
Don, bozor, birja
- 2022-yil 1-iyuldan boshlab g‘allani davlat tomonidan xarid qilish va sotishda bozor narxlariga o‘tiladi;
- fermer va klasterlar mustaqil ravishda bug‘doyni bozor narxlarida sotuvga qo‘yishi mumkin bo‘ladi;
- g‘allani birjaga qo‘ygan fermer va klasterlar uchun davlat tomonidan barcha shart-sharoitlar yaratiladi;
- g‘alla tayyorlovchi fermer va klasterlarni birjada ro‘yxatdan o‘tishini tashkil etish, ularga brokerlarni biriktirish va birja savdolariga o‘qitish bo‘yicha topshiriqlar berildi;
- fermerlar 2022-yil g‘alla hosilini sotishni tashkil etishda birja to‘lovlaridan ozod etiladi.
Sotib olish narxi va zaxiralar
- davlat ehtiyojlari uchun 1 tonna bug‘doyning xarid narxi o‘tgan yilgi 1,55 mln so‘mdan 3 mln so‘mga oshiriladi;
- Qishloq xo‘jaligi jamg‘armasi tomonidan sotib olingan 1,78 mln tonna bug‘doy talabdan kelib chiqqan holda birjaga qo‘yiladi;
- fermerlar ixtiyorida qolgan 500 ming tonna bug‘doy vaqtincha saqlash uchun non ishlab chiqarish korxonalariga qabul qilinadi. Bunda bug‘doyni vaqtincha saqlash xarajatlarini davlatning o‘zi qoplaydi.
Kompensatsiyalar, kreditlar va budjet
- iyul-avgust oylarida birjada shakllangan o‘rtacha narxlardan kelib chiqib, fermerlarga ijobiy farq to‘lanadi;
- joriy yilda ushbu maqsadlar uchun davlat tomonidan 6 trln so‘mdan ortiq mablag‘ ajratilib, agar avgust oyida birja narxi 3,5 mln/1 tonna bo‘lsa, fermerga 500 ming so‘m farq to‘lanadi;
- bu yilgi g‘alla hosili uchun 7,6 trln so‘m ajratiladi;
- “O‘zdonmahsulot” AJ va xususiy korxonalarning aylanma mablag‘larini to‘ldirish uchun 800 mlrd so‘m miqdorida kredit resurslari yo‘naltiriladi.
Korxonalar
- 2022-yil 1-avgustga qadar 20 ta don xo‘jaligi korxonalarining davlat ulushlarini sotish bo‘yicha topshiriq berildi;
- tegirmon korxonalarini ko‘paytirish, g‘alla yetishtirish maydonlarini kengaytirish va unumdorligini oshirish, chekka qishloqlarga un va un mahsulotlarini yetkazib berishda transport xarajatlarini qoplash tizimini joriy etish bo‘yicha topshiriqlar berildi.
Narxlar barqarorligi
Mamlakatimizning boshqa hududlari va xorijdan un va un mahsulotlarini olib kirish orqali bozorda taqchillikning oldini olish, narxlar barqarorligini ta’minlash uchun viloyatlar hokimlari shaxsan mas’uldir.
Izoh (0)