Аввалроқ жаҳон бозори ҳамда минтақавий биржалар нархлари таҳлил қилиниб, 1 тонна ғалла ҳосили учун кутилаётган минимал нарх 3 млн сўм бўлиши эълон қилинган эди.
Ғалла тайёрлашга ихтисослашган барча қишлоқ хўжалиги маҳсулотлари ишлаб чиқарувчиларни биржада рўйхатдан ўтказилишини ташкил этиш, уларни савдога ўргатиш ва брокерлар бириктириш керак, деб ёзади Қишлоқ хўжалиги вазирлиги.
Шунингдек, 1 августга қадар 20 та ғалла корхонасидаги давлат улушларини сотиш топширилган.
Бу ҳақда Ўзбекистон президенти раислигида мамлакатимизда ғаллачилик муаммоларига бағишланган кечаги йиғилишда маълум қилинди.
Бозорга йўналтирилган аграр тармоқни ривожлантириш учун аҳамиятли бўлган учрашувдан асосий тезислари:
Дон, бозор, биржа
- 2022 йил 1 июлдан бошлаб ғаллани давлат томонидан харид қилиш ва сотишда бозор нархларига ўтилади;
- фермер ва кластерлар мустақил равишда буғдойни бозор нархларида сотувга қўйиши мумкин бўлади;
- ғаллани биржага қўйган фермер ва кластерлар учун давлат томонидан барча шарт-шароитлар яратилади;
- ғалла тайёрловчи фермер ва кластерларни биржада рўйхатдан ўтишини ташкил этиш, уларга брокерларни бириктириш ва биржа савдоларига ўқитиш бўйича топшириқлар берилди;
- фермерлар 2022 йил ғалла ҳосилини сотишни ташкил этишда биржа тўловларидан озод этилади.
Сотиб олиш нархи ва захиралар
- давлат эҳтиёжлари учун 1 тонна буғдойнинг харид нархи ўтган йилги 1,55 млн сўмдан 3 млн сўмга оширилади;
- Қишлоқ хўжалиги жамғармаси томонидан сотиб олинган 1,78 млн тонна буғдой талабдан келиб чиққан ҳолда биржага қўйилади;
- фермерлар ихтиёрида қолган 500 минг тонна буғдой вақтинча сақлаш учун нон ишлаб чиқариш корхоналарига қабул қилинади. Бунда буғдойни вақтинча сақлаш харажатларини давлатнинг ўзи қоплайди.
Компенсациялар, кредитлар ва бюджет
- июль август ойларида биржада шаклланган ўртача нархлардан келиб чиқиб, фермерларга ижобий фарқ тўланади;
- жорий йилда ушбу мақсадлар учун давлат томонидан 6 трлн сўмдан ортиқ маблағ ажратилиб, агар август ойида биржа нархи 3,5 млн/1 тонна бўлса, фермерга 500 минг сўм фарқ тўланади;
- бу йилги ғалла ҳосили учун 7,6 трлн сўм ажратилади;
- «Ўздонмаҳсулот» АЖ ва хусусий корхоналарнинг айланма маблағларини тўлдириш учун 800 млрд сўм миқдорида кредит ресурслари йўналтирилади.
Корхоналар
- 2022 йил 1 августга қадар 20 та дон хўжалиги корхоналарининг давлат улушларини сотиш бўйича топшириқ берилди;
- тегирмон корхоналарини кўпайтириш, ғалла етиштириш майдонларини кенгайтириш ва унумдорлигини ошириш, чекка қишлоқларга ун ва ун маҳсулотларини етказиб беришда транспорт харажатларини қоплаш тизимини жорий этиш бўйича топшириқлар берилди.
Нархлар барқарорлиги
Мамлакатимизнинг бошқа ҳудудлари ва хориждан ун ва ун маҳсулотларини олиб кириш орқали бозорда тақчилликнинг олдини олиш, нархлар барқарорлигини таъминлаш учун вилоятлар ҳокимлари шахсан масъулдир.
Изоҳ (0)