O‘zbekistonda endi tirik donordan yoki inson murdasidan olingan inson a’zolari transplantatsiyasiga ruxsat beriladi

O‘zbekistonda “Inson a’zolari va to‘qimalarining transplantatsiyasi to‘g‘risida”gi qonun qabul qilindi. Bu haqda Telegram’dagi “Nigoh” kanali xabar qildi.

Qayd etilishicha, qonunning maqsadi inson a’zolari va to‘qimalarining transplantatsiyasi sohasidagi munosabatlarni tartibga solishdan iborat. Hujjatga ko‘ra, tirik donordan yoki inson murdasidan olingan inson a’zolari va (yoki) to‘qimalari transplantatsiya obyektlari bo‘lishi mumkin. Ularning ro‘yxati Vazirlar Mahkamasi tomonidan belgilanadi.

Sun’iy ravishda yetishtirilgan a’zolar transplantatsiya obyektlari bo‘lmaydi. Shuningdek, qonunning amal qilishi:

• insonning ko‘payishiga taalluqli bo‘lgan a’zolar va to‘qimalarning transplantatsiyasiga;
• a’zolar va to‘qimalarning autogen (bir shaxsning o‘zi tirik donor va retsipiyent bo‘ladi) transplantatsiyasiga;
• qon va uning tarkibiy qismlari donorligi sohasidagi munosabatlarga nisbatan tatbiq etilmaydi.

Qonunchilik palatasining 2021-yil 2-noyabrdagi majlisida “Inson a’zolari va to‘qimalarining transplantatsiyasi to‘g‘risida”gi qonun loyihasi ko‘rib chiqilgan. Unda inson a’zolari transplantatsiyasi uchun bemorga qarindosh bo‘lmaganlar ham donorlik qilishi mumkin bo‘lishi aytilgandi.

Oliy Majlis Senatining 22-yalpi majlisi 2021-yil 15—16-dekabr kuni videokonferensaloqa shaklida bo‘lib o‘tgandi. Unda “Inson a’zolari va to‘qimalarining transplantatsiyasi to‘g‘risida”gi qonun ma’qullandi.

17-mart kuni Senatning 24-yalpi majlisi bo‘lib o‘tgan va unda “Inson a’zolari va to‘qimalarining transplantatsiyasi to‘g‘risida”gi qonunlar qabul qilingani munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish haqida”gi qonun muhokama qilingan.