Ўзбекистонда энди тирик донордан ёки инсон мурдасидан олинган инсон аъзолари трансплантациясига рухсат берилади

Ўзбекистонда «Инсон аъзолари ва тўқималарининг трансплантацияси тўғрисида»ги қонун қабул қилинди. Бу ҳақда Telegram’даги «Нигоҳ» канали хабар қилди.

Қайд этилишича, қонуннинг мақсади инсон аъзолари ва тўқималарининг трансплантацияси соҳасидаги муносабатларни тартибга солишдан иборат. Ҳужжатга кўра, тирик донордан ёки инсон мурдасидан олинган инсон аъзолари ва (ёки) тўқималари трансплантация объектлари бўлиши мумкин. Уларнинг рўйхати Вазирлар Маҳкамаси томонидан белгиланади.

Сунъий равишда етиштирилган аъзолар трансплантация объектлари бўлмайди. Шунингдек, қонуннинг амал қилиши:

• инсоннинг кўпайишига тааллуқли бўлган аъзолар ва тўқималарнинг трансплантациясига;
• аъзолар ва тўқималарнинг аутоген (бир шахснинг ўзи тирик донор ва реципиент бўлади) трансплантациясига;
• қон ва унинг таркибий қисмлари донорлиги соҳасидаги муносабатларга нисбатан татбиқ этилмайди.

Қонунчилик палатасининг 2021 йил 2 ноябрдаги мажлисида «Инсон аъзолари ва тўқималарининг трансплантацияси тўғрисида»ги қонун лойиҳаси кўриб чиқилган. Унда инсон аъзолари трансплантацияси учун беморга қариндош бўлмаганлар ҳам донорлик қилиши мумкин бўлиши айтилганди.

Олий Мажлис Сенатининг 22-ялпи мажлиси 2021 йил 15—16 декабрь куни видеоконференцалоқа шаклида бўлиб ўтганди. Унда «Инсон аъзолари ва тўқималарининг трансплантацияси тўғрисида»ги қонун маъқулланди.

17 март куни Сенатнинг 24-ялпи мажлиси бўлиб ўтган ва унда «Инсон аъзолари ва тўқималарининг трансплантацияси тўғрисида»ги қонунлар қабул қилингани муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги қонун муҳокама қилинган.