Shri-Lanka 1948-yildan, ya’ni mamlakat Britaniyadan mustaqillikka erishganidan keyingi eng jiddiy inqirozni boshdan kechirmoqda. Mamlakatda bir necha oydirki norozilik namoyishlari tinmayapti.
Namoyishchilar mamlakat prezidenti va hukumatining so‘nggi o‘n yilliklardagi kuchli iqtisodiy inqiroz fonida olib borayotgan harakatlaridan norozi va ularning iste’fosini talab qilmoqda.
So‘nggi kunlarda mamlakatda norozilik namoyishlari kuchaygan. Namoyishchilar prezident qarorgohi binosiga bostirib kirishga bir necha bor uringan, avtomobillar va avtobuslarga o‘t qo‘ygan, oynalarni sindirgan, huquq-tartibot xodimlariga qarata turli buyumlarni uloqtirgan.
Politsiya tartibsizliklarni to‘xtatish uchun ko‘zni yoshlatuvchi gaz va suv purkagichlardan foydalangan. Avval politsiyachilarga namoyishchilarga qarata o‘t ochishga ham ruxsat berilgandi.
Mamlakatdagi tartibsizliklar oqibatida sakkiz kishi halok bo‘ldi, 219 kishi yaralandi. Yong‘inlar 60 ta avtomobil va 104 ta binoni vayron qildi.
Mamlakatda xorijdan keltiriladigan oziq-ovqat, yonilg‘i va dori-darmon yetishmayapti. O‘nga yaqin odam yonilg‘i uchun zich navbatlarda halok bo‘ldi.
Shu hafta Shri-Lanka prezidentining akasi, bosh vazir bo‘lib ishlab kelayotgan Mahinda Rajapaksa iste’foga chiqdi. Biroq namoyishchilar o‘z harakatlarini to‘xtatmadi, ular prezident Gotabay Rajapaksaning ham iste’fosini talab qilmoqda. Shri-Lanka hukumati butun mamlakat bo‘ylab komendantlik soati joriy qildi.
Izoh (0)