Microsoft korporatsiyasining asoschisi, dunyodagi eng boy odamlardan biri Bill Geyts COVID-19 yuqtirib oldi. Bu haqda uning o‘zi Twitter’da ma’lum qildi.
“COVID-19 uchun topshirgan testim musbat chiqdi, kasallikning yengil simptomlarini boshdan kechiryapman va mutaxassislarning maslahati bilan o‘zimni izolyatsiyaga oldim”, — deb yozdi u Twitter’da.
Milliarderning so‘zlariga ko‘ra, u ilgari koronavirusga qarshi emlangan, buster dozani ham olgan.
10-may kuni NATO matbuot kotibi Oana Lungesku alyansning bosh kotibi Yens Stoltenberg ham koronavirus bilan kasallanganini ma’lum qildi.
“NATO bosh kotibi Yens Stoltenbergda COVID-19 testi musbat chiqdi”, — deb yozdi Lungesku Twitter’da.
Vakilning so‘zlariga ko‘ra, Stoltenberg kasallikni yengil o‘tkazmoqda, u masofadan turib ishlashda davom etadi.
Stoltenberg to‘liq emlangan va buster dozani ham olgan, deya qo‘shimcha qildi Lungesku.
Avval AQSH davlat kotibi Entoni Blinken, Oq uy matbuot kotibi Jen Psaki, Pentagon rahbari Lloyd Ostin koronavirusni boshdan kechirgani, Uels shahzodasi Charlzda ikkinchi marta koronavirus aniqlangani, Turkiya prezidenti Rajab Toyyib Erdo‘g‘on Kiyevga safaridan so‘ng omikronga chalingani haqida xabarlar berilgandi.
Izoh (0)