Шри-Ланка 1948 йилдан, яъни мамлакат Британиядан мустақилликка эришганидан кейинги энг жиддий инқирозни бошдан кечирмоқда. Мамлакатда бир неча ойдирки норозилик намойишлари тинмаяпти.
Намойишчилар мамлакат президенти ва ҳукуматининг сўнгги ўн йилликлардаги кучли иқтисодий инқироз фонида олиб бораётган ҳаракатларидан норози ва уларнинг истеъфосини талаб қилмоқда.
Сўнгги кунларда мамлакатда норозилик намойишлари кучайган. Намойишчилар президент қароргоҳи биносига бостириб киришга бир неча бор уринган, автомобиллар ва автобусларга ўт қўйган, ойналарни синдирган, ҳуқуқ-тартибот ходимларига қарата турли буюмларни улоқтирган.
Полиция тартибсизликларни тўхтатиш учун кўзни ёшлатувчи газ ва сув пуркагичлардан фойдаланган. Аввал полициячиларга намойишчиларга қарата ўт очишга ҳам рухсат берилганди.
Мамлакатдаги тартибсизликлар оқибатида саккиз киши ҳалок бўлди, 219 киши яраланди. Ёнғинлар 60 та автомобиль ва 104 та бинони вайрон қилди.
Мамлакатда хориждан келтириладиган озиқ-овқат, ёнилғи ва дори-дармон етишмаяпти. Ўнга яқин одам ёнилғи учун зич навбатларда ҳалок бўлди.
Шу ҳафта Шри-Ланка президентининг акаси, бош вазир бўлиб ишлаб келаётган Маҳинда Ражапакса истеъфога чиқди. Бироқ намойишчилар ўз ҳаракатларини тўхтатмади, улар президент Готабай Ражапаксанинг ҳам истеъфосини талаб қилмоқда. Шри-Ланка ҳукумати бутун мамлакат бўйлаб комендантлик соати жорий қилди.
Изоҳ (0)