Maxsus film, yorqin raqslar, muxlislarni ham kuylatgan qo‘shiqlar. “Benom” guruhining kino-konsert dasturidan reportaj (foto va video)

3–5-may kunlari “Xalqlar do’stligi” san’at saroyida “Benom” guruhining yangi konsert dasturi taqdim etildi. “Daryo” muxbirlari ushbu dasturdan reportaj tayyorladi.Aslida “Yana bu biz” konsert dasturi 2020-yil o‘tkazilishi kerak edi. Ma’lum muddat ommaviy tadbirlarning cheklangani bois konsert ikki yildan so‘ng namoyish etildi.

“Yana bu biz” boshqa konsertlardan farqli ravishda, kino-konsert tarzda o‘tkazildi. Ya’ni muxlislar qo‘shiq tinglash bilan birga, muhabbat mavzusidagi kinoni ham tomosha qildi. Film konsertning 30 daqiqasini “band” etdi.

Konsertda jami 18 ta qo‘shiq ijro etilgan bo‘lsa, ularning ayrimlari muxlislar jo‘rligida kuylandi. Karaoke tarzida kuylangan qo‘shiqlar muxlislarga manzur kelganini payqash qiyin emasdi.

“Benom” guruhining konsert dasturi old qatorlarni to‘ldirib turgan mashhur san’atkorlardan holi o‘tdi. Uch kunlik konsertning ilk kunida Asal Shodiyeva va Shoxruhxon, so‘nggi kunida esa Muqaddas Sa’dullayeva va Yigitali Mamajonovlar tashrif buyurdi, xolos.

Konsert sahnasiga ajoyib o‘zgartirish kiritilgan. Ikki qavatga bo‘lingan sahna ko‘pchilikka ma’qul keldi.

— Konsertga qisqa vaqt ichida tayyorgarlik ko‘rishimizga to‘g‘ri keldi. Chunki ommaviy tadbirlarga ruxsat berishganidan so‘ng shoshilinch “Xalqlar do‘stligi” san’at saroyidagi kunlar band etilishi kerak edi.Konsertning ilk kuni hayajonlandik. Hatto odamlar zalga kirganida ham texnik jihatdan tayyorgarlik ko‘rayotgandik. Ammo muxlislar yaxshi qabul qilishdi, — deydi guruh a’zosi Sarvar.

Negadir dasturda raqslarga unchalik e’tibor qaratilmagan. Uch soatlik konsertda bor-yo‘g‘i uchtagina raqs ijro etildi.

Bu yigitlar Xorazmdan tashrif buyurgan ekan. Ular “Benom” guruhi tomonidan o‘tkazilgan “Birga kuylaymiz” tanlovida g‘olib bo‘lib, konsertda sevimli xonandalari bilan “Adashdimmi” taronasini kuyladi.

Muxlislar sevimli xonandalariga bo‘lgan mehrlarini ana shunday tarzda ko‘rsatdi.

Avvalgi konsertlarida mashhur xonandalar bilan duet kuygan “Benom” yigitlari bu safar duetdoshlikka yosh xonanda Zahidani tanladi. Ular “Asalim” nomli qo‘shiqni duet tarzida ijro etdi.

Odatda, o‘zbek xonandalarining konsertlarini boshlovchi yoki qiziqchining ishtirokisiz tasavvur etish qiyin. Ammo “Benom”ning konsertida boshlovchi bo‘lmadi. Yigitlar muxlislari bilan erkin muloqotga kirishdi.

Yigitlarning avvalgi konsert dasturi “Chunki bu biz” deb nomlangandi. Mazkur konsert dasturi nafaqat “Xalqlar do‘stligi” san’at saroyida balki barcha viloyatlarda ham o‘tkazilgandi.

— “Chunki bu biz” konsertini faqatgina Xorazmda namoyish etolmaganmiz. Chunki belgilangan kun yog‘ingarchilik bo‘lgan, biz texnikalarga aziyat yetmasligi va muxlislarga noqulaylik tug‘dirmaslik uchun konsertni qoldirgandik. Ertasi kuni konsert berishga esa viloyat hokimligi ruxsat bermagan. Xullas, 1200 km yo‘l bosib, ortimizga qaytishimizga to‘g‘ri kelgan, — deydi xonanda Sarvar.

“Benom” guruhining uch kunlik konsert dasturi o‘z nihoyasiga yetdi. Endilikda ular mazkur konsert bilan viloyatlar bo‘ylab ijodiy safar qilishni rejalashtirmoqda.

Ma’lumot uchun, “Benom” guruhi 2010-yil xonanda Lolaning otasi Ravshan Yo‘ldoshev tashkil etgan prodyuserlik kompaniyasi tomonidan tashkil etilgan. Ular “Qizaloq” qo‘shig‘i bilan tomoshabinlar nazariga tushgan edi.