Xande Erchel “Malikam endi qara”, “Eshigimni qoq” teleseriali namoyishidan keyin dunyoga mashhur aktrisaga aylandi. Ko‘pchilikni, jumladan, aktrisaning shaxsiy hayoti, sevimli mashg‘ulotlari va, albatta, Kerem Bursin bilan munosabatlari qiziqtiradi. “Lisa.ru” nashri bu haqda aksariyat tomoshabinlarga noma’lum bo‘lgan faktlar bilan bo‘lishdi.
Kichik shaharchada o‘tgan bolalik
Xande 1993-yil 24-noyabrda Bandirma shahrida tug‘ilgan. Aktrisa bu joyni juda yaxshi ko‘radi va bolaligi u yerda o‘tganidan xursand.
“Men Istanbulda katta bo‘lishni xohlamaganman. Kichkina joyda hamma bir-birini taniydi, shuning uchun u yerda erkin bo‘ladi. Biz hamma bolalar kabi ko‘chada non va tomat pastasini birga yeb, mahallada o‘sganmiz. Dadam shunday fe’l-atvorga ega ediki, biz tumandan tashqariga chiqa olmaganmiz”, — deb eslaydi Erchel.
Istanbulga ko‘chish
17 yoshida bo‘lajak aktrisa Istanbulga ko‘chib o‘tishga qaror qildi. U bolaligidan ijodkor bo‘lganligi sababli turk san’atini o‘rgangani universitetga o‘qishga kirdi.
Hashamatli uy
Xande 11 yildan beri Istanbulda yashaydi. Muvaffaqiyatli loyihalar tufayli u taxminan bir million dollarlik hashamatli uy sotib olishga muvaffaq bo‘ldi. Ma’lumki, aktrisa ta’mirlash uchun yana yuz ming dollar sarflagan va quruvchilar bilan shartnoma tuzgan, unga ko‘ra ular Xandening uyida o‘z ishlari suratlarini ko‘rsatishga haqli emas.
Sevimli singil
Xandening Gamze ismli singlisi bor. Ular bir-biri bilan juda qadrdon va aktrisaning sahifasida Gamze va uning qizi Mavi bilan suratlar tez-tez paydo bo‘ladi.
“Singlim Gamze bilan oramizda bir yil farq bor. Biz egizaklardekmiz va xuddi shunday tarbiyalanganmiz. Sochlarimiz bir xil turmaklanar, bir xil kiyim kiyar edik. Bir necha yil o‘tib, ulg‘ayganimizda va turli xil kiyimlarni kiyishni boshlaganimizda, oramizda janjallar bo‘ldi. Ikkimizning ham shu kunlarni eslatadigan chandiqlarimiz bor. Gamze yaramas edi va barcha aybni menga yuklardi”, — deydi kulib aktrisa.
Mashhur xolasiga o‘xshaydigan jiyan
Xandening fikricha, Mavi unga juda o‘xshaydi. Aktrisa jiyanini telbalarcha yaxshi ko‘radi va butun bo‘sh vaqtini u bilan o‘tkazishga harakat qiladi. Ammo u hali ona bo‘lishni rejalashtirmayapti, lekin farzandlari ham o‘zi kabi bo‘lishini orzu qiladi.
“Mavi bizning oilamiz uchun haqiqiy sovg‘adir. Bu haqiqatan ham dunyodagi hech narsaga o‘xshamaydigan tuyg‘u. Men har doim oilam haqida ko‘p o‘ylardim, lekin Mavining dunyoga kelishi meni singlimga yanada yaqinlashtirdi. Onalik unga juda yarashadi. Menimcha, hali vaqtim bor. Menda hali bunday rejalar yo‘q”, — deya ta’kidlaydi aktrisa.
Go‘zallik tanlovi ishtirokchisi
19 yoshida Erchel aktrisalik karyerasini qurish uchun universitetni tark etishga qaror qildi. Shunday qilib birinchi navbatda u Ozarbayjonda o‘tkazilgan go‘zallik tanlovida ishtirok etdi. U yerda bo‘lajak yulduz ikkinchi o‘rinni egalladi.
90 ta kasting
Xande darhol kino olamiga kirishga muvaffaq bo‘lmadi. U “Choliqushi” romanining yangi versiyasida kichik rolga ruxsat berilgunga qadar 90 ga yaqin kastinglarda qatnashdi. Aktrisaning debyuti 2013-yilda bo‘lib o‘tdi, ammo u asosiy rolga tasdiqlanishi uchun yana uch yil kutishga to‘g‘ri keldi.
Kino uchun qurbonliklar
Ma’lum bo‘lishicha, ko‘plab rejissorlar uni juda to‘lacha deb hisoblaganlari uchun u bilan hamkorlik qilishni xohlamagan. Keyin Xande harakat qildi va vazn yo‘qotishni boshladi: u to‘g‘ri ovqatlandi va murabbiy nazoratida sport bilan shug‘ullandi. Bugungi kunda aktrisa o‘zining qomatini bir xilda ushlab turish uchun tinimsiz harakat qiladi.
Birinchi bosh rol
2016-yilda “Gunesh qizlari” serialining premyerasi bo‘lib o‘tdi, unda Erchel kelishgan va boy yigitni sevib qolgan yosh qizni o‘ynadi. Yoshlarning sevgisiga ota-onalarning oilaviy sirlari to‘sqinlik qiladi, ular ham farzandlarining munosabatlariga qarshi.
Ushbu turk dramasi aktrisaga shon-sharafning birinchi qismini olib keldi. Shundan so‘ng “Malikam endi qara”, “Qora marvarid”, “Halqa”, “Aziza” va boshqa muvaffaqiyatli loyihalarda ishtirok etdi.
Shartnoma shartlari
2016-yilda Xande turk kinematografiyasida o‘sib borayotgan yulduz sifatida e’tirof etilganida, unga L’Oreal kompaniyasi hamkorlikda ishlashni taklif qilgan. Qizig‘i shundaki, shartnoma shartlariga ko‘ra, aktrisaga bir yil davomida sochini bo‘yash taqiqlangan.
Onaning kasalligi
Xande onasini juda yaxshi ko‘radi, afsuski, u 2019-yilda undan ayrildi. Aktrisaning onasi saraton kasalligi bilan kurashdi, ammo kasallikka dosh bera olmadi.
“5 oktabr — bir yil oldingi bu kunni eslayman. Men tizzangizda yotibman, siz sochlarimni silaysiz. Sizning qizingiz bo‘lish men uchun katta mukofot. Siz qanchalik go‘zalsiz, onam ... bu dunyoda bo‘lganingiz uchun sizdan minnatdorman ... ”, — deb yozgandi aktrisa o‘zining sahifasida.
Bugungi kunda u “Saratonsiz hayot”ning elchisi bo'lib, uning oilasi bilan bir xil muammolarga duch kelgan odamlarga va ularning oilalariga yordam berishga harakat qiladi.
Eda Yildiz roli
2020-yilda Erchelga uni butun dunyoga mashhur qilgan loyihada ishtirok etish taklif qilindi. “Eshigimni qoq” teleserialida u landshaft dizayneri bo‘lishni orzu qilgan qiz sifatida qayta tug‘ildi.
Ammo Eda grantini olib qo‘ygan yosh tadbirkor Serkan Bolat tufayli universitetdagi o‘qishini tashlab ketishga majbur bo‘ladi. Qizig‘i shundaki, shaxsan uchrashgach, yoshlar bir-birlarini sevib qolishadi.
“Ssenariyni o‘qiganimda Eda meni juda xursand qildi. Uning hayotiy energiyasi nihoyatda yuqori. Hayotga ijobiy qaraydigan ayol bo‘lish, nima istayotganini bilish va shu maqsad sari intilish, o‘zida kuch topish, o‘jarlik, qat’iylik — Edadan o‘rganmoqchi bo‘lgan ko‘p jihatlar bor. Men aktrisalikni, suratga tushishni yaxshi ko‘raman. Bu juda qadrli. Biz bu loyiha ustida aql bovar qilmaydigan jamoa bilan ishladik”, — deydi Erchel.
Kerem Bursin bilan munosabat
“Eshigimni qoq” seriali chiqqandan so‘ng ko‘plab muxlislar asosiy rollarning ijrochilari haqiqiy hayotda uchrashishlarini payqab qoldi. Keyinchalik ularning taxminlarini aktyorlarning o‘zlari tasdiqladi, ular birgalikda chiqishni boshladi va oradagi his-tuyg‘ularini yashirmadi.
Biroq, 2022-yil bahorining boshida juftlik ajrashdi, degan mish-mishlar paydo bo‘ldi — Kerem Bursinning vakillari ham bunga ishora qilishdi. Xandega kelsak, u sahifasidan Kerem bilan birga tushgan barcha suratlarni o‘chirib tashladi va uni kuzatishni to‘xtatdi. Biroq, shu paytgacha aktrisa ularning ajralishi haqida hech qanday izoh bermagan.
Sevgi bu…
“Men uchun muhabbat aqldan ozishdir. Mening eng dahshatli va eng jonli holatlarim oshiqligimda namoyon bo‘ladi. Bu ham eng yaxshi, ham ayni paytda eng qiyin sahifa”, — deydi Xande.
Xobbi
Erchel rasm chizishni yaxshi ko‘radi va bir kun kelib bo‘sh vaqtlarida ijod qilish, keyin esa o‘z ishini boshqalarga ko‘rsatish uchun rasm ustaxonasi ochishni orzu qiladi.
Sevimli uy hayvoni
Xandening yaxshi ko‘radigan ikkita iti bor, biroq aktrisa so‘nggi paytlarda ular bilan ko‘p vaqt o‘tkazmayapti.
“Men bandligim tufayli ular bilan vaqt o‘tkaza olmayman, lekin imkon bo‘lganda hammamiz bog‘da sayr qilamiz”, — deydi Erchel.
Orzular ro‘yobi
“Men doim shu kunlar kelishini orzu qilardim. Agar niyat qilmasangiz, u amalga oshmaydi. Xavotirga tushgan, qo‘rqib ketgan paytlarim ham bo‘lgan. Men uchun juda qiyin bo‘lgan dam ham tushdi boshimga, lekin biror narsani xohlasangiz, yo‘lingizga nima to‘sqinlik qilmasin, uni rad eta olmaysiz. Siz orzuga erishguningizcha yo‘lda davom etasiz”, — deydi Xande Erchel.
Izoh (0)