Махсус фильм, ёрқин рақслар, мухлисларни ҳам куйлатган қўшиқлар. «Беном» гуруҳининг кино-концерт дастуридан репортаж (фото ва видео)

3–5 май кунлари «Халқлар дўстлиги» санъат саройида «Беном» гуруҳининг янги концерт дастури тақдим этилди. «Дарё» мухбирлари ушбу дастурдан репортаж тайёрлади.Аслида «Яна бу биз» концерт дастури 2020 йил ўтказилиши керак эди. Маълум муддат оммавий тадбирларнинг чеклангани боис концерт икки йилдан сўнг намойиш этилди.

«Яна бу биз» бошқа концертлардан фарқли равишда, кино-концерт тарзда ўтказилди. Яъни мухлислар қўшиқ тинглаш билан бирга, муҳаббат мавзусидаги кинони ҳам томоша қилди. Фильм концертнинг 30 дақиқасини «банд» этди.

Концертда жами 18 та қўшиқ ижро этилган бўлса, уларнинг айримлари мухлислар жўрлигида куйланди. Караоке тарзида куйланган қўшиқлар мухлисларга манзур келганини пайқаш қийин эмасди.

«Беном» гуруҳининг концерт дастури олд қаторларни тўлдириб турган машҳур санъаткорлардан ҳоли ўтди. Уч кунлик концертнинг илк кунида Асал Шодиева ва Шохруҳхон, сўнгги кунида эса Муқаддас Саъдуллаева ва Йигитали Мамажоновлар ташриф буюрди, холос.

Концерт саҳнасига ажойиб ўзгартириш киритилган. Икки қаватга бўлинган саҳна кўпчиликка маъқул келди.

— Концертга қисқа вақт ичида тайёргарлик кўришимизга тўғри келди. Чунки оммавий тадбирларга рухсат беришганидан сўнг шошилинч «Халқлар дўстлиги» санъат саройидаги кунлар банд этилиши керак эди.Концертнинг илк куни ҳаяжонландик. Ҳатто одамлар залга кирганида ҳам техник жиҳатдан тайёргарлик кўраётгандик. Аммо мухлислар яхши қабул қилишди, — дейди гуруҳ аъзоси Сарвар.

Негадир дастурда рақсларга унчалик эътибор қаратилмаган. Уч соатлик концертда бор-йўғи учтагина рақс ижро этилди.

Бу йигитлар Хоразмдан ташриф буюрган экан. Улар «Беном» гуруҳи томонидан ўтказилган «Бирга куйлаймиз» танловида ғолиб бўлиб, концертда севимли хонандалари билан «Адашдимми» таронасини куйлади.

Мухлислар севимли хонандаларига бўлган меҳрларини ана шундай тарзда кўрсатди.

Аввалги концертларида машҳур хонандалар билан дуэт куйган «Беном» йигитлари бу сафар дуэтдошликка ёш хонанда Заҳидани танлади. Улар «Асалим» номли қўшиқни дуэт тарзида ижро этди.

Одатда, ўзбек хонандаларининг концертларини бошловчи ёки қизиқчининг иштирокисиз тасаввур этиш қийин. Аммо «Беном»нинг концертида бошловчи бўлмади. Йигитлар мухлислари билан эркин мулоқотга киришди.

Йигитларнинг аввалги концерт дастури «Чунки бу биз» деб номланганди. Мазкур концерт дастури нафақат «Халқлар дўстлиги» санъат саройида балки барча вилоятларда ҳам ўтказилганди.

— «Чунки бу биз» концертини фақатгина Хоразмда намойиш этолмаганмиз. Чунки белгиланган кун ёғингарчилик бўлган, биз техникаларга азият етмаслиги ва мухлисларга ноқулайлик туғдирмаслик учун концертни қолдиргандик. Эртаси куни концерт беришга эса вилоят ҳокимлиги рухсат бермаган. Хуллас, 1200 км йўл босиб, ортимизга қайтишимизга тўғри келган, — дейди хонанда Сарвар.

«Беном» гуруҳининг уч кунлик концерт дастури ўз ниҳоясига етди. Эндиликда улар мазкур концерт билан вилоятлар бўйлаб ижодий сафар қилишни режалаштирмоқда.

Маълумот учун, «Беном» гуруҳи 2010 йил хонанда Лоланинг отаси Равшан Йўлдошев ташкил этган продюсерлик компанияси томонидан ташкил этилган. Улар «Қизалоқ» қўшиғи билан томошабинлар назарига тушган эди.