O‘zbekistonning mis sanoatidan oladigan daromadi ayni paytda 2.5 milliard dollarni tashkil etadi. 2029-yilga kelib, mis ishlab chiqarishni 400 ming tonnagacha oshirish bilan bu ko‘rsatkich turdosh tarmoqlarni hisobga olgan holda, yuqori qiymatga ega tayyor mahsulot ishlab chiqarish quvvatlarini yaratish hisobiga 7-8 milliard AQSh dollariga yetishi mumkin. Aynan shu maqsadda Olmaliq kon-metallurgiya kombinatida ham mis sanoati klasterini rivojlantirish bo‘yicha bir qator samarali ishlar boshlab yuborilgan.
Jumladan, kombinatda tashkil etilgan mis sanoati klasterini rivojlantirish xizmati tomonidan klaster konsepsiyasini ishlab chiqish maqsadida Kanadaning Hatch kompaniyasi jalb qilingan (Hatch — kon, energetika va infratuzilma sohalarida mijozlarga konsalting, muhandislik, texnologiya, axborot tizimlari va loyiha qurilishni boshqarish xizmatlarini ko‘rsatadigan yetakchi xalqaro global muhandislik kompaniyasi hisoblanadi).
Ayni kunlarda ushbu kompaniya mutaxassislari bilan doimiy tarzda videoaloqa vositasi orqali amaliy ishlar olib borilmoqda.
Bundan tashqari, mis sanoati klasterini rivojlantirish doirasida nodir metallardan qo‘shimcha qiymatli mahsulotlar olish ham ko‘zda tutilgan. Xususan, kombinatda nodir metallar va qattiq qotishmalar ishlab chiqarish bo‘yicha ilmiy ishlab chiqarish birlashmasining 2022—2024-yillarga mo‘ljallangan dasturi ishlab chiqildi.
Dasturga muvofiq, 4 ta yo‘nalish bo‘yicha jami 33 ta loyiha doirasida 82,39 million dollar investitsiyalarni o‘zlashtirish, 623 ta yangi ish o‘rinlari tashkil etish rejalashtirilgan. Natijada qo‘shimcha 3,91 trillion so‘m (2021-yilga nisbatan 3,3 barobar) tovar mahsuloti ishlab chiqariladi va 186,0 million dollar (2021-yilga nisbatan 1,8 barobar) qo‘shimcha eksport amalga oshiriladi.
Nodir metallardan yuqori qiymatli mahsulotlar ishlab chiqarish yo‘nalishida umumiy qiymati 19,75 million dollarlik 11 ta loyiha doirasida ish olib borilmoqda. Jumladan, molibden ishlab chiqarishni yiliga 800 tonnadan 1200 tonnaga ko‘paytirish loyihasi (qiymati 0,3 million dollar) bo‘yicha mavjud uskunalarni modernizatsiya qilish va yangilash ko‘zda tutilgan. Bugungi kunda uskunalarni o‘rnatish va bino-inshootlarni rekonstruksiya qilish ishlari to‘liq nihoyasiga yetkazildi.
Natijada yiliga 17,2 million dollarlik 400 tonna molibden ishlab chiqariladi. Ishlab chiqarishdan olinadigan sof foyda yilliga 5,0 million dollarni tashkil etishi kutilmoqda.
Shu bilan bir qatorda birlashma quvvatlarini kengaytirish va yangi turdagi mahsulotlarni ishlab chiqarish bo‘yicha loyihalarni xorijiy investorlar bilan amalga oshirish va qo‘shma korxonalar tashkil etish bo‘yicha Germaniyaning Falk Porsche Technik Gmbh kompaniyasi va OKMK o‘rtasida hamkorlikda faoliyati to‘g‘risidagi kelishuv imzolandi.
Unga ko‘ra, Germaniyaning Falk Porsche Technik Gmbh kompaniyasi tomonidan umumiy qiymati 4 ta loyiha amalga oshirish bo‘yicha 19,0 million dollarlik xorijiy investitsiyalar jalb etish rejalashtirilmoqda.
Shuningdek, ilmiy-izlanish ishlari sohasida yetakchi hisoblangan Xitoyning BGRIMM kompaniyasi va OKMK o‘rtasida o‘zaro anglashuv va hamkorlik memorandumi imzolandi. Hamkorlikdan ko‘zlangan maqsad esa geologiya, kon ishlari va metallurgiya sohasida kadrlarni tayyorlash va qayta tayyorlash, rangli va noyob metallarni ajratib olishda yangi texnologiyalarni o‘rganish, boyitish jarayoniga yangi zamonaviy va avtomatlashtirilgan tizimlarni tatbiq etishdan iborat.
Yana bir e’tiborli jihat quyosh batareyalari sohasida dunyoda yetakchi hisoblangan Xitoyning Longi Solar Technology Co kompaniyasi bilan ham kombinat o‘rtasida o‘zaro anglashuv va hamkorlik memorandumi imzolandi. Mazkur memorandum doirasida respublika hududida quvvati 250 MVt dan kam bo‘lmagan quyosh elektrostansiyasining qurilishi bilan bog‘liq texnik-iqtisodiy ishlanmalar va ushbu loyihaga chet ellik investorlarni jalb etish sohasida ishlar olib borilishi nazarda tutilgan.
Mazkur loyihalarni amalga oshirish natijasida OKMKda elektr energiyasiga bo‘lgan talabni qisman qoplash imkonini berish bilan bir qatorda, kombinat ishlab chiqarayotgan mahsulotlarni jahon bozorlarida raqobatbardoshliligini yanada oshirishga asos bo‘ladi.
Ma’lumot sheriklik huquqi asosida tayyorlandi.
Izoh (0)