Ўзбекистоннинг мис саноатидан оладиган даромади айни пайтда 2.5 миллиард долларни ташкил этади. 2029 йилга келиб, мис ишлаб чиқаришни 400 минг тоннагача ошириш билан бу кўрсаткич турдош тармоқларни ҳисобга олган ҳолда, юқори қийматга эга тайёр маҳсулот ишлаб чиқариш қувватларини яратиш ҳисобига 7-8 миллиард АҚШ долларига етиши мумкин. Айнан шу мақсадда Олмалиқ кон-металлургия комбинатида ҳам мис саноати кластерини ривожлантириш бўйича бир қатор самарали ишлар бошлаб юборилган.
Жумладан, комбинатда ташкил этилган мис саноати кластерини ривожлантириш хизмати томонидан кластер концепциясини ишлаб чиқиш мақсадида Канаданинг Hatch компанияси жалб қилинган (Hatch — кон, энергетика ва инфратузилма соҳаларида мижозларга консалтинг, муҳандислик, технология, ахборот тизимлари ва лойиҳа қурилишни бошқариш хизматларини кўрсатадиган етакчи халқаро глобал муҳандислик компанияси ҳисобланади).
Айни кунларда ушбу компания мутахассислари билан доимий тарзда видеоалоқа воситаси орқали амалий ишлар олиб борилмоқда.
Бундан ташқари, мис саноати кластерини ривожлантириш доирасида нодир металлардан қўшимча қийматли маҳсулотлар олиш ҳам кўзда тутилган. Хусусан, комбинатда нодир металлар ва қаттиқ қотишмалар ишлаб чиқариш бўйича илмий ишлаб чиқариш бирлашмасининг 2022—2024 йилларга мўлжалланган дастури ишлаб чиқилди.
Дастурга мувофиқ, 4 та йўналиш бўйича жами 33 та лойиҳа доирасида 82,39 миллион доллар инвестицияларни ўзлаштириш, 623 та янги иш ўринлари ташкил этиш режалаштирилган. Натижада қўшимча 3,91 триллион сўм (2021 йилга нисбатан 3,3 баробар) товар маҳсулоти ишлаб чиқарилади ва 186,0 миллион доллар (2021 йилга нисбатан 1,8 баробар) қўшимча экспорт амалга оширилади.
Нодир металлардан юқори қийматли маҳсулотлар ишлаб чиқариш йўналишида умумий қиймати 19,75 миллион долларлик 11 та лойиҳа доирасида иш олиб борилмоқда. Жумладан, молибден ишлаб чиқаришни йилига 800 тоннадан 1200 тоннага кўпайтириш лойиҳаси (қиймати 0,3 миллион доллар) бўйича мавжуд ускуналарни модернизация қилиш ва янгилаш кўзда тутилган. Бугунги кунда ускуналарни ўрнатиш ва бино-иншоотларни реконструкция қилиш ишлари тўлиқ ниҳоясига етказилди.
Натижада йилига 17,2 миллион долларлик 400 тонна молибден ишлаб чиқарилади. Ишлаб чиқаришдан олинадиган соф фойда йиллига 5,0 миллион долларни ташкил этиши кутилмоқда.
Шу билан бир қаторда бирлашма қувватларини кенгайтириш ва янги турдаги маҳсулотларни ишлаб чиқариш бўйича лойиҳаларни хорижий инвесторлар билан амалга ошириш ва қўшма корхоналар ташкил этиш бўйича Германиянинг Falk Porsche Technik Gmbh компанияси ва ОКМК ўртасида ҳамкорликда фаолияти тўғрисидаги келишув имзоланди.
Унга кўра, Германиянинг Falk Porsche Technik Gmbh компанияси томонидан умумий қиймати 4 та лойиҳа амалга ошириш бўйича 19,0 миллион долларлик хорижий инвестициялар жалб этиш режалаштирилмоқда.
Шунингдек, илмий-изланиш ишлари соҳасида етакчи ҳисобланган Хитойнинг BGRIMM компанияси ва ОКМК ўртасида ўзаро англашув ва ҳамкорлик меморандуми имзоланди. Ҳамкорликдан кўзланган мақсад эса геология, кон ишлари ва металлургия соҳасида кадрларни тайёрлаш ва қайта тайёрлаш, рангли ва ноёб металларни ажратиб олишда янги технологияларни ўрганиш, бойитиш жараёнига янги замонавий ва автоматлаштирилган тизимларни татбиқ этишдан иборат.
Яна бир эътиборли жиҳат қуёш батареялари соҳасида дунёда етакчи ҳисобланган Хитойнинг Longi Solar Technology Co компанияси билан ҳам комбинат ўртасида ўзаро англашув ва ҳамкорлик меморандуми имзоланди. Мазкур меморандум доирасида республика ҳудудида қуввати 250 МВт дан кам бўлмаган қуёш электростанциясининг қурилиши билан боғлиқ техник-иқтисодий ишланмалар ва ушбу лойиҳага чет эллик инвесторларни жалб этиш соҳасида ишлар олиб борилиши назарда тутилган.
Мазкур лойиҳаларни амалга ошириш натижасида ОКМКда электр энергиясига бўлган талабни қисман қоплаш имконини бериш билан бир қаторда, комбинат ишлаб чиқараётган маҳсулотларни жаҳон бозорларида рақобатбардошлилигини янада оширишга асос бўлади.
Маълумот шериклик ҳуқуқи асосида тайёрланди.
Изоҳ (0)