Андижон вилояти Асака туманида фермер хўжаликларидан бирига ер майдони бўйича суд ишини ижобий ҳал этиб бериш эвазига пул сўраган ҳокимлик юрисконсулти қўлга олинди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Андижон вилояти бошқармалари томонидан Асака туман прокуратураси билан ҳамкорликда тезкор тадбир ўтказилган. Тадбирда туман ҳокимлигининг юрисконсулти Х.Қ. «Қ.Н.» фермер хўжалиги иш юритувчиси Б.Н.нинг ишончига кириб, ушбу хўжаликнинг ихтиёрига берилган 20,2 гектар ер майдони бўйича «Н.М.» фермер хўжалиги ўртасидаги Андижон туманлараро маъмурий судида апелляция тартибида кўрилаётган ишни вилоят судида ишловчи танишлари ёрдамида ижобий ҳал қилишни ваъда бергани аниқланган.
У хизмати эвазига 1,5 минг доллар сўраган ва хизмат хонасида олдиндан 1000 долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда мактаб балансидаги ерни 10,4 минг долларга сотиб, пулига Gentra олган сохта орган ходими ушлангани, Тошкент вилоятида давлат захирасидаги ерни 40 минг долларга сотишга уринган шахс қўлга олингани тўғрисида хабар берилганди.
Изоҳ (0)