Karlo Anchelotti: Yarim final “Real” uchun muvaffaqiyat emas, biz finalga chiqishni istaymiz

“Real” bosh murabbiyi Karlo Anchelotti Chempionlar Ligasi yarim final dastlabki bahsi doirasida “Manchester Siti”ga qarshi kechadigan o‘yin oldidan o‘z fikrlarini bildirib o‘tdi.

Chempionlar Ligasi yarim finali qirol Karlo va shahzoda Pep o‘rtasida kechishi haqida

Menimcha, qirol shahzodadan katta, shuning uchun men buni tan olishim kerak. Gvardiola — buyuk novator, u hujumkor uslubni taklif qildi va futbol olamiga yangilik olib kirdi. Murabbiylar o‘yinda g‘alaba qozonmaydi, murabbiy qila oladigan eng katta ish — mag‘lub bo‘lish, deganda u haq edi.

“Real”ning Chempionlar Ligasidagi maqsadi haqida

Biz uchun “Real”ning ushbu musobaqadagi tarixi juda muhim, raqiblarimiz uchun esa undan ham muhimroq. Yillar davomida yozilgan bu tarix futbolchilarga klub formasining og‘irligini his qilishga yordam beradi va bu ijobiy ta’sir ko‘rsatadi. Bu futbolkada maydonga tushish futbolchiga yaxshi ma’noda mas’uliyat yuklaydi.

Yarim finalga hech kim kutmagan ikki jamoa chiqdi — “Real” va “Vilyarreal”. Ushbu bosqichga yetib kelganimizdan xursandmiz va kurashishda davom etamiz. “Real” doim oxirigacha kurashgan.

Qarama-qarshilik natijasi Manchesterda emas, “Santyago Bernabeu”da hal bo‘ladi. Yarim final biz uchun muvaffaqiyat emas, biz finalga chiqishni istaymiz. Maqsadimiz final va odatda, finallarda “Real” g‘alaba qozonish uchun ajoyib imkoniyatga ega bo‘ladi.

Nima uchun “Real”ga qaytgani haqida

Chunki jamoaga murabbiy kerak edi. Qaytganimdan xursandman, ammo bu mening qarorim emas. “Real” buni uddalashimga ishondi va bu yerda ishlayotganimdan baxtiyorman.

Karlo Anchelotti, “Real” bosh murabbiyi