“Manchester Yunayted”ning yozgi transfer oynasidagi maqsadlari ma’lum bo‘ldi

“Manchester Yunayted”ning yangi bosh murabbiyi Erik ten Hag jamoani kuchaytirish uchun imkoniyatga ega bo‘ladi.

ESPN nashrining xabariga ko‘ra, niderlandiyalik mutaxassisga yozda transferlarni amalga oshirish uchun 100—150 million funt sterling mablag‘ ajratiladi. Undan tashqari futbolchilarning sotuvidan tushgan pullar ham transferlarga sarflanadi.

Mankunianliklar Erik Bayi, Fil Jons, Aleks Telles, Aaron Uan-Bissaka va Antoni Marsyalga keladigan takliflarni ko‘rib chiqishga tayyor. Shuningdek, Nemanya Matich, Pol Pogba, Jessi Lingard, Xuan Mata va Edinson Kavani yozda erkin agent sifatida jamoani tark etishi kutilmoqda. Darvozabon Din Henderson ketishni xohlagandi, ammo “Manchester Yunayted” uni ijaraga berishni ma’qul topmoqda.

Ten Hag David de Xeaning ham o‘yin uslubi o‘zining tizimiga mos kelishiga shubha bilan qaramoqda, ammo hozir transfer bozorida undan ham muhimroq vazifalar kutib turibdi. “Qizil iblislar”ning yangi bosh murabbiyi istalgan transferni amalga oshirish huquqiga ega bo‘ladi. Niderlandiyalik mutaxassis jamoadagi muhim pozitsiyalardagi qisqa ro‘yxatlarga ham ta’sir o‘tkazishi mumkin.

Avvalroq Ralf Rangnik yozda jamoa 10 ta yangi transferni amalga oshirishi mumkinligini aytgandi. Ammo ten Hag uch futbolchini xarid qilish masalasini ko‘rib chiqadi.

Mankunianliklar hozirda jiddiy muammolarga duch kelayotgan himoya chizig‘ini kuchaytirish maqsadida bir nechta variantni ko‘rib chiqmoqda. “Vilyarreal” futbolchisi Pau Torres va “Ayaks” a’zosi Yurrien Timber “Manchester Yunayted”ning qiziqishlari doirasida bo‘lib turibdi.