Toshkentdagi “Guanjou” klinikasida o‘tkazilgan tekshiruv davomida dori vositalarini qo‘lbola usulda qalbakilashtirish holatlari aniqlangani, holat yuzasidan jinoyat ishi qo‘zg‘atilgani haqida xabar berilgandi. Toshkent shahar Ichki ishlar bosh boshqarmasi tergovga oid qo‘shimcha ma’lumot berdi.
Qayd etilishicha, Toshkent shahar IIBB huzuridagi Tergov boshqarmasi Guangzhou Medical of China MCHJ mansabdor shaxslari va xodimlariga nisbatan jinoyat ishi doirasida tergov harakatlari olib bormoqda. Hozirga qadar IIBga bir nechta fuqarolar murojaat qilib, shifoxonaga kelganda ularning qon tahlillari o‘rganilmay, diagnostik tekshiruv o‘tkazilmay, faqat tashqi ko‘zdan kechirish bo‘yicha tashxis qo‘yishganini ma’lum qilgan. Ularning ta’kidlashicha, bemorlarga noma’lum dori vositalarini 1,5 million so‘mdan 2,5 million so‘mgacha o‘tkazishgan, biroq muolajalar samara bermagan.
“Televizor reklamasida ko‘rgandim shifoxonani. Kasalligim bois borib uchrashdim. 2,4 million so‘m to‘lasangiz, tuzatamiz, dori beramiz dedi. 3 kun terapiya qildi, bir haftadan keyin yana og‘riq tutdi”, — deydi mijozlardan biri.
Klinikaning Toshkent shahri va viloyatdagi filiallarida o‘tkazilgan tintuv jarayonlarida kelib chiqishi va yaroqliligiga doir hujjatlari bo‘lmagan bir necha turdagi mahalliy va xorijiy dori vositalari aniqlanib, tekshirish uchun ashyoviy dalil sifatida olingan,
Holat yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish, shuningdek tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.
Muolajalardan davo topmagan bemorlar klinikaga shikoyat qilib kelganida, xodimlar ularni boshqa bemorlarning oldida shov-shuv ko‘tarmasliklari uchun tinchlantirishga harakat qilgan.
“Meni tuzatolmayapsizlar, pulimni qaytaringlar dedim. Ular bo‘lsa qaytarmaymiz, qayoqqa borsang bor deyishdi. Keyin ish boshqaruvchisiga bordim, odamlar eshitmasin, mana shu pulni qaytaramiz, yarmiga dori ichgansiz dedi. Shunaqa qilib pulimni ololmay yuribman”, — deydi bemorlardan biri.
Hozirda klinikadan olingan dori vositalarining kelib chiqishi va tarkibini aniqlashga doir tekshiruvlar o‘tkazilmoqda.
Izoh (0)