Toshkentda OITSga chalingan stomatolog bemorlarni davolab kelgani aniqlandi

Toshkent shahri Shayxontohur tumanida oliy ma’lumotli stomatolog orttirilgan immunitet tanqisligi sindromini yuqtirib olib, bemorlarni davolash bilan shug‘ullangani aniqlandi. Bu haqda “Yangi davr” informatsion dasturida xabar qilindi.

Qayd etilishicha, ushbu kasallikni yuqtirib olgan shifokor ortiq bu sohada faoliyat olib borishi mumkin emas. Ammo Z. ismli yigit (29 yoshli) buni bila turib, stomatologiya sohasida ishlab kelgan. U Instagram ijtimoiy tarmog‘i orqali tanishgan qizdan kasallik yuqtirib olgan. Oradan 2 oy o‘tib sog‘lig‘ida o‘zgarishlar kuzatilgan.

“Boshida allergiya bo‘ldim, deb o‘yladim. Keyin shifokorga bordim. Oxiri shubhalanib, test topshirishga qaror qildim.

Ikki marta ko‘rishganman, shu bilan boshqa gaplashmagandim. 2 oylar o‘tib shu kasallik chiqib keldi”, — degan u.

2021-dekabr Toshkent shahar OITSga qarshi kurashish markazi xodimlari yigitni nazoratga olib, unga kasallik to‘g‘risida tushuntirish bergan. Agar u o‘zi bilgan holda kasallikni boshqalarga yuqtirsa yoki yuqtirish xavfi ostida qoldirsa, jinoiy javobgarlikka tortilishi haqida rasman ogohlantirilgan.

O‘tkazilgan tezkor tadbirda fuqaro Z. Sog‘liqni saqlash vazirligining tegishli buyruqlarini buzgan holda OITS bilan kasallangan shaxslarga taqiqlangan kasbiy faoliyat bilan shug‘ullanib kelgani aniqlangan. Tegishli hujjatlar rasmiylashtirilib, IIB huzuridagi tergov bo‘limiga yuborilgan.

Holat yuzasidan unga nisbatan Jinoyat kodeksining 113-moddasi (tanosil yoki OIV kasalligi/OITSni tarqatish) bilan jinoyat ishi qo‘zg‘atilgan. Hozirda tergov harakatlari olib borilmoqda.

Qonunchilik normalariga ko‘ra, ushbu jinoyatni sodir etgan shaxs 5 yilgacha ozodlikdan mahrum qilish bilan jazolanadi.

Eslatib o‘tamiz, bugungi kunda respublikada 45 ming nafar odamlar OITS (SPID) bilan yashab kelmoqda. Ularning 55 foizi erkaklar, 45 foizi ayollar, 14 foizini esa 18 yoshga to‘lmagan bolalar tashkil etadi.

Respublika OITSga qarshi kurash markazi direktori o‘rinbosari Gulifor Normurodova 10 yillik ma’lumotlarga ko‘ra, ushbu kasallikka chalingan bolalar yildan yilga kamayib borayotganini aytgan edi.