Jizzaxda Nexia bilan to‘qnashgan Lacetti’da qisilib qolgan erkak qutqarildi. Nexia haydovchisi vafot etib, uch yo‘lovchi tan jarohati oldi

Jizzax Nexia va Lacetti ishtirokida yuz bergan YTHda bir kishi halok bo‘lib, to‘rt kishi jarohatlandi.

Jizzax viloyati Favqulodda vaziyatlar boshqarmasi xabariga ko‘ra, 23-aprel kuni soat 13:40 larda 4P-35 avtomobil yo‘lining Do‘stlik tumani hududidan o‘tuvchi qismida yo‘l-transport hodisasi sodir bo‘lganligi to‘g‘risida ma’lumot kelib tushgan. Voqea joyiga zudlik bilan boshqarma yong‘in-qutqaruv otryadi hamda Do‘stlik tumani FVBdan qutqaruvchilar bo‘linmasi yetib borgan.

Aniqlanishicha, Gagarin—Jizzax yo‘nalishida harakatlanayotgan Nexia mashinasi qarama-qarshi yo‘nalishdagi Lacetti bilan to‘qnashuvi natijasida YTH sodir bo‘lgan.

Qutqaruv ishlari davomida Lacetti salonida qisilib qolgan haydovchi maxsus uskunalar yordamida chiqarilib, tibbiyot xodimlariga topshirilgan. Nexia haydovchisi esa og‘ir tan jarohatlari tufayli voqea joyida vafot etgan, yana uch nafar fuqaro turli tan jarohatlari bilan Mirzacho‘l tumani tibbiyot birlashmasiga yotqizilgan.