Afg‘onistonning Qunduz shahridagi masjidda sodir bo‘lgan portlash oqibatida kamida 33 kishi halok bo‘ldi, yana 43 kishi jarohat oldi. Bu haqda “Tolibon” vakili Zabihulla Mujohid ma’lum qildi, deb xabar beradi “RIA Novosti”.
Portlash haqida Afg‘oniston mahalliy OAVlari 22-aprel kuni yozgan. O‘z bayonotida Mujohid “Tolibon” harakati ushbu jinoyatni qoralashini ma’lum qilib, qurbonlarning yaqinlariga hamdardlik bildirgan. Harakat vakili aybdorlar qo‘lga olinib, jazoga tortilishini ta’kidlagan.
20-aprel kuni Kobulning g‘arbiy tumanlaridan biridagi ta’lim muassasalari yaqinida kamida uchta portlash sodir bo‘lgani to‘g‘risida xabar berilgandi. Ma’lumotlarga ko‘ra, birinchi portlash “Mumtoz” o‘quv markazi yaqinida, so‘ngra yana ikkita portlash Abdul Rahim Shahid o‘g‘il bolalar o‘rta maktabi yaqinida sodir bo‘lgan. 21-aprel kuni esa Qunduz shahrida gumanitar yordamni olayotgan olomon orasida portlovchi qurilma ishga tushib ketgandi. Oqibatda 4 kishi halok bo‘lgan va 18 kishi jarohat olgan.
Shuningdek, 21-aprel kuni Mozori Sharifdagi masjidda portlash sodir bo‘lgan. Khaama Press agentligi ma’lumotlariga ko‘ra, portlash oqibatida 30 kishi halok bo‘lgan, 80 kishi jarohat olgan. Mazkur portlash bo‘yicha mas’uliyatni ISHID terrorchilik tashkiloti o‘z zimmasiga olgan.
Ariana News telekanalining mahalliy politsiyaga tayanib yozishicha, portlashni tashkillashtirishda gumonlangan shaxs qo‘lga olingan. “ISHIDning Balxdagi asosiy a’zosi Hamid Sangaryyar xavfsizlik kuchlari tomonidan Chohar Bolak tumanida o‘tkazilgan maxsus operatsiyada ushlandi”, — deyiladi xabarda.
BMT bosh kotibi Antoniu Guterrish Afg‘onistonda amalga oshirilgan teraktlarni qoralagan. “U halok bo‘lganlarning oila a’zolariga chuqur hamdardlik bildirib, jarohatlanganlarning tezroq sog‘ayib ketishini tilaydi. Aholiga va fuqarolik obyektlariga, jumladan, masjidlarga hujum qilish xalqaro gumanitar huquqqa muvofiq qat’iyan taqiqlanadi”, — deydi BMT matbuot kotibi.
Izoh (0)