Афғонистоннинг Қундуз шаҳридаги масжидда содир бўлган портлаш оқибатида камида 33 киши ҳалок бўлди, яна 43 киши жароҳат олди. Бу ҳақда «Толибон» вакили Забиҳулла Мужоҳид маълум қилди, деб хабар беради «РИА Новости».
Портлаш ҳақида Афғонистон маҳаллий ОАВлари 22 апрель куни ёзган. Ўз баёнотида Мужоҳид «Толибон» ҳаракати ушбу жиноятни қоралашини маълум қилиб, қурбонларнинг яқинларига ҳамдардлик билдирган. Ҳаракат вакили айбдорлар қўлга олиниб, жазога тортилишини таъкидлаган.
20 апрель куни Кобулнинг ғарбий туманларидан биридаги таълим муассасалари яқинида камида учта портлаш содир бўлгани тўғрисида хабар берилганди. Маълумотларга кўра, биринчи портлаш «Мумтоз» ўқув маркази яқинида, сўнгра яна иккита портлаш Абдул Раҳим Шаҳид ўғил болалар ўрта мактаби яқинида содир бўлган. 21 апрель куни эса Қундуз шаҳрида гуманитар ёрдамни олаётган оломон орасида портловчи қурилма ишга тушиб кетганди. Оқибатда 4 киши ҳалок бўлган ва 18 киши жароҳат олган.
Шунингдек, 21 апрель куни Мозори Шарифдаги масжидда портлаш содир бўлган. Khaama Press агентлиги маълумотларига кўра, портлаш оқибатида 30 киши ҳалок бўлган, 80 киши жароҳат олган. Мазкур портлаш бўйича масъулиятни ИШИД террорчилик ташкилоти ўз зиммасига олган.
Ariana News телеканалининг маҳаллий полицияга таяниб ёзишича, портлашни ташкиллаштиришда гумонланган шахс қўлга олинган. «ИШИДнинг Балхдаги асосий аъзоси Ҳамид Сангарйяр хавфсизлик кучлари томонидан Чоҳар Болак туманида ўтказилган махсус операцияда ушланди», — дейилади хабарда.
БМТ бош котиби Антониу Гутерриш Афғонистонда амалга оширилган терактларни қоралаган. «У ҳалок бўлганларнинг оила аъзоларига чуқур ҳамдардлик билдириб, жароҳатланганларнинг тезроқ соғайиб кетишини тилайди. Аҳолига ва фуқаролик объектларига, жумладан, масжидларга ҳужум қилиш халқаро гуманитар ҳуқуққа мувофиқ қатъиян тақиқланади», — дейди БМТ матбуот котиби.
Изоҳ (0)