Ruslan Kazakbayev boshqa ishga o‘tishi munosabati bilan Qirg‘iziston tashqi ishlar vaziri lavozimidan ozod qilindi. Mamlakat prezidenti Sadir Japarov TIV rahbarini bo‘shatish haqidagi farmonni imzolagan.
Qirg‘iziston tashqi ishlar vaziri vazifasini Prezident administratsiyasida tashqi siyosat bo‘limi boshlig‘i lavozimida faoliyat yuritgan Jeenbek Kulubayev bajaradi. Japarov tegishli farmon bilan uni ham avval administratsiyada egallab turgan lavozimidan ozod qilgan.
Kazakbayev ikki marta 2010 – 2012-yillarda va keyinchalik 2020-yil 14-oktabrdan 2022-yil aprel oyigacha tashqi ishlar vaziri lavozimini egallagandi. Shuningdek, u 2009-yilda tashqi ishlar vaziri o‘rinbosari, 2004 – 2009-yillarda esa Qirg‘izistonning Istanbuldagi bosh konsuli lavozimida ishlagan.
Tashqi ishlar vaziri vazifasini bajaruvchi Kulubayev 2018 – 2021-yillarda Qirg‘izistonning Qozog‘istondagi elchisi bo‘lgan. Bunga qadar 2007 – 2009-yillarda Malayziya, 2009 – 2013-yillarda Xitoydagi elchi, o‘rindoshlik asosida Mongoliya va Singapurdagi elchi (Pekindagi rezidensiyada 2010 – 2013-yillar) lavozimida faoliyat olib borgan. 2013 – 2016-yillarda TIVning Osiyo va Afrika departamentiga rahbarlik qilgan.
Avval Qozog‘iston TIV rahbari mamlakatning LXR va DXR mustaqilligini tan olmasligini ma’lum qilgani, Xitoy tashqi ishlar vaziri Rossiyaga qarshi sanksiyalarni nomaqbul deb atagani, shuningdek mart boshida Qirg‘iziston TIV rahbari Ruslan Kazakbayevning Bishkek Moskva hamda Kiyev o‘rtasida Ukrainadagi urush tufayli olib borilayotgan muzokaralar uchun maydon hozirlashga tayyorligini bildirgani haqida xabarlar berilgandi.
Izoh (0)