Bugungi kunda butun davlatning rivojlanishi IT sohasining rivojlanishiga bevosita bog‘liq. Shuning uchun dunyoning ko‘pgina mamlakatlari birinchi navbatda barcha e’tiborini butun IT sohasini yaxshilash uchun qulay shart-sharoitlarni yaratishga qaratmoqdalar. Shu jumladan, yurtimizda ham IT’ni o‘rganishni istaydigan yosh o‘g‘il-qizlarni qo‘llab-quvvatlash maqsadida ko‘pgina dasturlar amalga oshirilmoqda.
Bularga misol sifatida o‘quvchi qizlarni IT sohasiga ko‘proq jalb etish, raqamli ko‘nikmalarni rivojlantirish maqsadida Xalq ta’limi vazirligi huzuridagi “Innovatsiya, texnologiya va strategiya markazi” DUK Shveysariya elchixonasi bilan hamkorlikda tashkil etgan “Qizlarning IT ko‘nikmalarini rivojlantirish” (Digital Empowerment of Girls / ICT4Girls) loyihasini ko‘rsatib o‘tishimiz mumkin.
ICT4Girls loyihasi nima uchun kerak?
Qizlarga IT sohasidagi bilimlarni puxta egallashga yordam berib kelayotgan “Qizlarning IT ko‘nikmalarini rivojlantirish” loyihasi maktab, kasb-hunar maktablari, kollej va texnikumlar o‘quvchi qizlari uchun mo‘ljallangan bo‘lib, ularda ishtirok etish mutlaqo bepul.
Loyiha doirasida amalga oshirilayotgan tadbirlardan ko‘zlangan maqsad, O‘zbekiston xotin-qizlarining IT sohasidagi salohiyatini oshirish, jamiyatimizda mavjud turli salbiy stereotiplarni o‘zgartirish orqali qizlarni qo‘llab-quvvatlovchi muhit yaratish, shuningdek, qizlarga IT yo‘nalishida mavjud ta’lim imkoniyatlari va ish o‘rinlari haqida ma’lumot berishdir.
2021-yil noyabr oyida start olgan loyiha doirasida quyidagi dasturlar amalga oshirilmoqda.
Targ‘ibot kampaniyasi — qizlarni qo‘llab-quvvatlovchi muhit yaratish uchun tashlangan qadam
Ko‘p yillar davomida shakllanib, qolib ketgan stereotiplar natijasida ayollar boshlab bergan IT sohasi keyinchalik erkaklar kasbiga aylanib ketdi. Hozirgi kunda ham qizlar uchun IT sohasiga kirishda ko‘plab to‘siq va stereotiplar mavjud: “IT sohasi juda qiyin va alohida fikrlashni talab qiladi”, “Dasturlash qizlarning ishi emas”, degan fikrlarni ko‘pchiligimiz eshitganmiz.
Ota-onalar, yaqinlarda mavjud shu kabi xayoliy to‘siqlarini bartaraf qilish hamda qizlarning IT sohasiga qiziqishini oshirish maqsadida, loyiha doirasida kichik ijtimoiy videoroliklar ishlab chiqilmoqda. IT sohasini “yigitlar kasbi” deb atash noto‘g‘ri ekanligi, aql talab qiladigan ishlar jins tanlamasligi ta’kidlangan roliklar yurtimiz OAVlari, ommabop sayt va bloglarda namoyish etilmoqda.
Barcha videoroliklarni loyihaning rasmiy Telegram kanalida tomosha qilishingiz mumkin.
ICT4Girls Mentorship — IT loyihalar ishlab chiqish va ularni boshqarishni o‘rgatuvchi dastur
IT sohasida ma’lum bilim va ko‘nikmalarga ega 455 nafar arizachi orasidan 10 nafar qiz saralab olinib, o‘z sohasi mutaxassislari bo‘lgan mentorlarga biriktirilgan. Mentorlar joriy yilning yanvar oyidan boshlab, qizlarga o‘z yo‘nalishlari bo‘yicha bilim va ko‘nikmalarini rivojlantirishlari uchun maslahatlar berib kelmoqda. Qizlar dastur davomida ma’lum ijtimoiy muammoga yechim sifatida IT mahsulot yaratishi lozim. Dastur yakunida eng yuqori baholangan 3 IT mahsulotga ularni amalga oshirish uchun 50 million so‘mlik grant taqdim etiladi.
ICT4Girls Digital Camp — qizlarning iqtidorini yuzaga chiqarish uchun yana bir imkoniyat
Digital Camp dasturi 23—26-mart kunlari Toshkent viloyatidagi dam olish maskanlarining birida tashkil etilib, unda O‘zbekistonning turli hududlaridan tanlov asosida saralab olingan 100 nafar qiz ishtirok etdi. Dastur Women Techmakers Tashkent jamiyati bilan hamkorlikda tashkil etildi.
Ishtirokchilar 5 yo‘nalish — veb-dasturlash, veb-dizayn, mobil dasturlash, raqamli marketing va STEM bo‘yicha tajribali mutaxassislar tomonidan ishlab chiqilgan o‘quv mashg‘ulotlarida o‘z bilim va ko‘nikmalarini oshirishga muvaffaq bo‘ldi.
IT oromgohda NASA, Apple, Uber, EPAM kabi nufuzli tashkilotlar mutaxassislari ham professional rivojlanish, IT sohasida qizlar bosib o‘tadigan yo‘l, qizlar uchun yaratilayotgan imkoniyatlar kabi qiziqarli mavzularda taqdimot qilib, ishtirokchilarning qiziqtirgan savollariga javob berishdi.
Dastur so‘ngida yo‘nalish bo‘yicha imtihon o‘tkazilib, yuqori baholangan 5 nafar qiz noutbuk bilan taqdirlandi.
Onlayn kurslar — talab yuqori bo‘lgan sohalarni masofadan o‘rganish imkoniyati
ITSM maktab bitiruvchilarini kasbga yo‘naltirish uchun qo‘shimcha shart-sharoitlar yaratish, maktab o‘quvchilarini kasblar katalogi va ushbu kasblarning xususiyatlari bilan yaqindan tanishtirish maqsadida prof.maktab.uz platfomasini ishlab chiqmoqda. Ushbu platforma ICT4Girls loyihasi doirasida yaratilgan zamonaviy sohalarni qamrab oluvchi yangi kurslar bilan boyitildi.
Bugungi kunda UNICEF, UNESCO va Shveysariyaning O‘zbekistondagi elchixonasi bilan hamkorlikda ishlab chiqilgan ushbu platformada o‘quvchilarning turli sohalarda bilim va ko‘nikmalarini rivojlantirishga qaratilgan ko‘plab trening va kurslar, shaxsiyat testlari va boshqalar jamlangan.
Forum
Joriy yilning may oyi o‘rtalarida tashkil etilishi rejalashtirilayotgan forum IT sohasidagi qizlarga yurtimizdagi talab va e’tiborni ko‘rsatish, o‘qib izlanishga, o‘z ustida ko‘proq ishlashga motivatsiya berish, IT sohasiga aloqador muammolarni aniqlash va yechim-takliflar ishlab chiqish hamda IT sohasida ishga joylashish imkoniyatlari bilan tanishtirish maqsadida tashkil etiladi. Forumda tegishli davlat va nodavlat muassasalari, xalqaro tashkilotlar, IT kompaniyalar vakillari o‘z nutqi bilan ishtirok etishi kutilmoqda. Batafsil ma’lumot loyihaning rasmiy Telegram kanalida berib borilmoqda.
Navbat sizga, sizning fikringiz biz uchun muhim!
ICT4Girls tashkiliy jamoasi mamlakatimiz qizlarini IT sohasiga qiziqtirish, ularning bilim va ko‘nikmalarini rivojlantirishga qaratilgan dasturlarni kengaytirishni rejalashtiryapti. Shu maqsadda, ITSM jamoasi ayni kunlarda qizlarning IT’ga bo‘lgan qiziqishini o‘rganmoqda. Siz ham IT’ga qiziqsangiz, bu borada fikr va mulohazalaringiz bo‘lsa, ushbu so‘rovnomada qatnashing va loyihani rivojlantirish, yangi dasturlar tashkil etilishiga o‘z hissangizni qo‘shing.
O‘ylaymizki, loyiha tez orada o‘zining oliy maqsadi — iqtidorli va bilimi kuchli qizlar potensialini keng namoyon qilib, IT sohasida ayol dasturchilar, dizaynerlar va boshqa turdagi mutaxassislar ko‘payishi maqsadiga erishadi.
Reklama huquqi asosida.
Izoh (0)