Бугунги кунда бутун давлатнинг ривожланиши IT соҳасининг ривожланишига бевосита боғлиқ. Шунинг учун дунёнинг кўпгина мамлакатлари биринчи навбатда барча эътиборини бутун IT соҳасини яхшилаш учун қулай шарт-шароитларни яратишга қаратмоқдалар. Шу жумладан, юртимизда ҳам IT’ни ўрганишни истайдиган ёш ўғил-қизларни қўллаб-қувватлаш мақсадида кўпгина дастурлар амалга оширилмоқда.
Буларга мисол сифатида ўқувчи қизларни IT соҳасига кўпроқ жалб этиш, рақамли кўникмаларни ривожлантириш мақсадида Халқ таълими вазирлиги ҳузуридаги «Инновация, технология ва стратегия маркази» ДУК Швейцария элчихонаси билан ҳамкорликда ташкил этган «Қизларнинг IT кўникмаларини ривожлантириш» (Digital Empowerment of Girls / ICT4Girls) лойиҳасини кўрсатиб ўтишимиз мумкин.
ICT4Girls лойиҳаси нима учун керак?
Қизларга IT соҳасидаги билимларни пухта эгаллашга ёрдам бериб келаётган «Қизларнинг IT кўникмаларини ривожлантириш» лойиҳаси мактаб, касб-ҳунар мактаблари, коллеж ва техникумлар ўқувчи қизлари учун мўлжалланган бўлиб, уларда иштирок этиш мутлақо бепул.
Лойиҳа доирасида амалга оширилаётган тадбирлардан кўзланган мақсад, Ўзбекистон хотин-қизларининг IT соҳасидаги салоҳиятини ошириш, жамиятимизда мавжуд турли салбий стереотипларни ўзгартириш орқали қизларни қўллаб-қувватловчи муҳит яратиш, шунингдек, қизларга IT йўналишида мавжуд таълим имкониятлари ва иш ўринлари ҳақида маълумот беришдир.
2021 йил ноябрь ойида старт олган лойиҳа доирасида қуйидаги дастурлар амалга оширилмоқда.
Тарғибот кампанияси — қизларни қўллаб-қувватловчи муҳит яратиш учун ташланган қадам
Кўп йиллар давомида шаклланиб, қолиб кетган стереотиплар натижасида аёллар бошлаб берган IT соҳаси кейинчалик эркаклар касбига айланиб кетди. Ҳозирги кунда ҳам қизлар учун IT соҳасига киришда кўплаб тўсиқ ва стереотиплар мавжуд: «IT соҳаси жуда қийин ва алоҳида фикрлашни талаб қилади», «Дастурлаш қизларнинг иши эмас», деган фикрларни кўпчилигимиз эшитганмиз.
Ота-оналар, яқинларда мавжуд шу каби хаёлий тўсиқларини бартараф қилиш ҳамда қизларнинг IT соҳасига қизиқишини ошириш мақсадида, лойиҳа доирасида кичик ижтимоий видеороликлар ишлаб чиқилмоқда. IT соҳасини «йигитлар касби» деб аташ нотўғри эканлиги, ақл талаб қиладиган ишлар жинс танламаслиги таъкидланган роликлар юртимиз ОАВлари, оммабоп сайт ва блогларда намойиш этилмоқда.
Барча видеороликларни лойиҳанинг расмий Telegram каналида томоша қилишингиз мумкин.
ICT4Girls Mentorship — IT лойиҳалар ишлаб чиқиш ва уларни бошқаришни ўргатувчи дастур
IT соҳасида маълум билим ва кўникмаларга эга 455 нафар аризачи орасидан 10 нафар қиз саралаб олиниб, ўз соҳаси мутахассислари бўлган менторларга бириктирилган. Менторлар жорий йилнинг январь ойидан бошлаб, қизларга ўз йўналишлари бўйича билим ва кўникмаларини ривожлантиришлари учун маслаҳатлар бериб келмоқда. Қизлар дастур давомида маълум ижтимоий муаммога ечим сифатида IT маҳсулот яратиши лозим. Дастур якунида энг юқори баҳоланган 3 IT маҳсулотга уларни амалга ошириш учун 50 миллион сўмлик грант тақдим этилади.
ICT4Girls Digital Camp — қизларнинг иқтидорини юзага чиқариш учун яна бир имконият
Digital Camp дастури 23—26 март кунлари Тошкент вилоятидаги дам олиш масканларининг бирида ташкил этилиб, унда Ўзбекистоннинг турли ҳудудларидан танлов асосида саралаб олинган 100 нафар қиз иштирок этди. Дастур Women Techmakers Tashkent жамияти билан ҳамкорликда ташкил этилди.
Иштирокчилар 5 йўналиш — веб-дастурлаш, веб-дизайн, мобил дастурлаш, рақамли маркетинг ва STEM бўйича тажрибали мутахассислар томонидан ишлаб чиқилган ўқув машғулотларида ўз билим ва кўникмаларини оширишга муваффақ бўлди.
IT оромгоҳда NASA, Apple, Uber, EPAM каби нуфузли ташкилотлар мутахассислари ҳам профессионал ривожланиш, IT соҳасида қизлар босиб ўтадиган йўл, қизлар учун яратилаётган имкониятлар каби қизиқарли мавзуларда тақдимот қилиб, иштирокчиларнинг қизиқтирган саволларига жавоб беришди.
Дастур сўнгида йўналиш бўйича имтиҳон ўтказилиб, юқори баҳоланган 5 нафар қиз ноутбук билан тақдирланди.
Онлайн курслар — талаб юқори бўлган соҳаларни масофадан ўрганиш имконияти
ITSM мактаб битирувчиларини касбга йўналтириш учун қўшимча шарт-шароитлар яратиш, мактаб ўқувчиларини касблар каталоги ва ушбу касбларнинг хусусиятлари билан яқиндан таништириш мақсадида prof.maktab.uz платфомасини ишлаб чиқмоқда. Ушбу платформа ICT4Girls лойиҳаси доирасида яратилган замонавий соҳаларни қамраб олувчи янги курслар билан бойитилди.
Бугунги кунда UNICEF, UNESCO ва Швейцариянинг Ўзбекистондаги элчихонаси билан ҳамкорликда ишлаб чиқилган ушбу платформада ўқувчиларнинг турли соҳаларда билим ва кўникмаларини ривожлантиришга қаратилган кўплаб тренинг ва курслар, шахсият тестлари ва бошқалар жамланган.
Форум
Жорий йилнинг май ойи ўрталарида ташкил этилиши режалаштирилаётган форум IT соҳасидаги қизларга юртимиздаги талаб ва эътиборни кўрсатиш, ўқиб изланишга, ўз устида кўпроқ ишлашга мотивация бериш, IT соҳасига алоқадор муаммоларни аниқлаш ва ечим-таклифлар ишлаб чиқиш ҳамда IT соҳасида ишга жойлашиш имкониятлари билан таништириш мақсадида ташкил этилади. Форумда тегишли давлат ва нодавлат муассасалари, халқаро ташкилотлар, IТ компаниялар вакиллари ўз нутқи билан иштирок этиши кутилмоқда. Батафсил маълумот лойиҳанинг расмий Telegram каналида бериб борилмоқда.
Навбат сизга, сизнинг фикрингиз биз учун муҳим!
ICT4Girls ташкилий жамоаси мамлакатимиз қизларини IT соҳасига қизиқтириш, уларнинг билим ва кўникмаларини ривожлантиришга қаратилган дастурларни кенгайтиришни режалаштиряпти. Шу мақсадда, ITSM жамоаси айни кунларда қизларнинг IT’га бўлган қизиқишини ўрганмоқда. Сиз ҳам IT’га қизиқсангиз, бу борада фикр ва мулоҳазаларингиз бўлса, ушбу сўровномада қатнашинг ва лойиҳани ривожлантириш, янги дастурлар ташкил этилишига ўз ҳиссангизни қўшинг.
Ўйлаймизки, лойиҳа тез орада ўзининг олий мақсади — иқтидорли ва билими кучли қизлар потенциалини кенг намоён қилиб, IT соҳасида аёл дастурчилар, дизайнерлар ва бошқа турдаги мутахассислар кўпайиши мақсадига эришади.
Реклама ҳуқуқи асосида.
Изоҳ (0)