Ukraina ittifoqchilaridan “butun” samolyotlarni emas, faqatgina ehtiyot qismlar va ularga qo‘shimcha uskunalarni qabul qilib olgan. Bu haqda Pentagon matbuot kotibi Jon Kirbi ma’lum qildi. Avvalroq u Kiyevga qiruvchi samolyotlar va ehtiyot qismlar topshirilgani haqida gapirgandi.
“Kecha brifingda Ukraina ‘butun samolyotlar’ni qabul qilib olgani haqida aytgandim. Men aslida ‘butun’ demadim, ammo so‘zlarim shunaqa taassurot qoldirdi. Men xato qildim. Ular boshqa davlatlardan butun samolyotlarni olmagan”, — deydi Kirbi.
Uning ta’kidlashicha, Ukraina ittifoqchilari va Qo‘shma Shtatlardan ikki-uch hafta oldingiga qaraganda ko‘proq samolyot ekspluatatsiya qilish uchun “yetarlicha ehtiyot qismlar va qo‘shimcha uskunalarni” olgan.
“Yevropeyskaya pravda”ning yozishicha, Ukraina Qurolli kuchlari, shuningdek, ittifoqchilaridan samolyotlar olgani to‘g‘risidagi xabarlarni rad etgan. Ma’lum qilinishicha, ularga Ukraina qurollanishidagi mavjud samolyotlarni qayta tiklashga xizmat qiladigan ehtiyot qismlar topshirilgan.
Aprel boshlarida prezident Vladimir Zelenskiy AQSHdan “yurtini himoya qilish uchun biror narsa berishni” so‘ragan edi. Uning so‘zlariga ko‘ra, ukrainalik harbiylar zirhli nimchalar va shlemlar o‘rniga samolyot hamda raketalar olishni xohlaydi.
Keyinroq AQSH Senati Ukrainaga lend-liz dasturi bilan qurol yetkazib berish haqidagi qonun loyihasini ma’qullagandi. Qonun Jo Baydenga Ukrainaga qurol va boshqa yordamlar yetkazib berishni tezlashtirish imkonini beradi. Pentagon hisob-kitoblariga ko‘ra, Jo Bayden prezidentlikka kelganidan beri Qo‘shma Shtatlar Ukrainaga 2,3 milliard dollar harbiy yordam ko‘rsatgan, shundan 1,6 milliard dollari urush boshlanganidan keyin berilgan.
Izoh (0)