Rossiya davlat dumasi O‘zbekiston hukumati bilan mamlakatda qolishning soddalashtirilgan tartibi to‘g‘risidagi kelishuvni ratifikatsiya qildi. Bu haqda Rossiya parlamenti quyi palatasi xabar berdi.
Hujjat bilan O‘zbekiston fuqarolari va O‘zbekistonga kirgan rossiyaliklar uchun mamlakatga kirgan kundan boshlab 15 kun (hozirda 7 kun) ichida majburiy ro‘yxatdan o‘tishni bekor qilish taklif qilinmoqda.
Ma’lum qilinishicha, mamlakatlar hukumatlari o‘rtasidagi kelishuv 2021-yilning 21-mayida Moskvada va 2021-yilning 17-iyunida Toshkentda imzolangan.
Xuddi shunday yondashuv Belarus, Qozog‘iston, Tojikiston, Armaniston va Qirg‘iziston fuqarolariga, shuningdek, ushbu davlatlarga kelgan rossiyaliklarga ham tegishli.
Eslatib o‘tamiz, 2021-yilning avgustida Rossiyada muhojirlar uchun rus tilidan imtihon o‘tkazishning yangi qoidalari joriy etilgandi. Unga ko‘ra, muhojirlar endi rus tili, Rossiya tarixi va qonunchiligi bo‘yicha imtihonlarda beriladigan taxminiy savollarni oldindan bilib olishi mumkin. Imtihonlar yozma bo‘ladi, lekin Rossiyada uzoq vaqt qolishni istaganlar rus tilida muloqot qilish qobiliyatini ko‘rsatishi kerak. Avvalroq esa Rossiyada migrantlarning mamlakatdan chiqib ketishi kuzatilayotgani haqida xabar berilgan edi.
Izoh (0)