O‘zbekistonda surishtiruv va tergov harakatlarida intizomni buzgani uchun ichki ishlar organlarining 7 nafar xodimiga chora ko‘rilgan. Bu haqda AOKAda o‘tkazilgan brifingda Oliy Majlisning Inson huquqlari bo‘yicha vakili axborot xizmati rahbari Fotima Madrahimova ma’lum qildi.
Ma’lum qilinishicha, 2021-yil davomida erkinligi cheklangan shaxslar saqlanadigan joylarda monitoring o‘tkazilib, 4,5 mingdan ortiq shaxs bilan jamoaviy va 758 nafar shaxs bilan yakka tartibda suhbat o‘tkazilgan.
Qayd etilishicha, ombudsman nomiga yopiq muassasalarda saqlanayotgan shaxslar, ularning yaqin qarindoshlari hamda advokatlari tomonidan 6 104 ta murojaat kelib tushgan. Ularning 2 119 tasi bevosita yopiq muassasalarda saqlanayotgan shaxslarning murojaatlaridir.
Shikoyatlar yuzasidan o‘tkazilgan xizmat tekshiruvi yakunlariga ko‘ra, 4 ta holatda surishtiruv va tergov harakatlarida intizomni buzgani uchun ichki ishlar organlarining 7 nafar xodimiga chora ko‘rilgan.
Ombudsman tomonidan qiynoqlarning oldini olish bo‘yicha amalga oshirilgan monitoring tashriflari yuzasidan tayyorlangan choraklik tahliliy axborotlar va yillik ma’ruza Oliy Majlis palatalariga taqdim etilgan.
Eslatib o‘tamiz, 2021-yilda Toshkentda “O‘zbekistonda milliy preventiv mexanizmni xalqaro standartlar asosida rivojlantirish istiqbollari” mavzusida o‘tkazilgan xalqaro konferensiyada inson huquqlari bo‘yicha vakil Feruza Eshmatova “qamoqxonalarda qiynoq holatlarini deyarli uchratgani yo‘q”ligini ma’lum qilgandi.
Izoh (0)