Jahon banki Rossiyaning Ukrainaga bostirib kirgani munosabati bilan bu yilgi global iqtisodiy o‘sish bo‘yicha taxminlarini pasaytirdi. Bu haqda Bloomberg xabar bermoqda.
Vashingtonda joylashgan ushbu bank hozirda dunyoda yuzaga kelayotgan turli inqirozlarni bartaraf etish ustida ishlayapti. Bu uchun u COVID-19 oqibatlari uchun ajratilganidan ko‘ra ko‘proq mablag‘ to‘plamini safarbar qilishni rejalashtirmoqda.
Biz global o‘sish bo‘yicha 2022-yilning yanvar oyidagi taxminlarni 4,1 foizdan 3,2 foizga tushirdik, — dedi Jahon banki prezidenti Devid Malpass.
Malpassning so‘zlariga ko‘ra, pasayish Yevropa va Markaziy Osiyo, jumladan, Rossiya va Ukraina iqtisoding pasayishi bilan bog‘liq. Bu yilgi global prognoz 2021-yildagi 5,7 foiz o‘sish bilan taqqoslanadi.
Jahon banki rahbari kelgusi haftalarda 2022-yil apreldan 2023-yilning iyunigacha qamrab olinadigan 170 milliard dollarlik inqirozga qarshi yangi 15 oylik paket muhokamasi bo‘lishini ma’lum qildi. Bu summaning qariyb 50 milliard dollari keyingi uch oy ichida ajratiladi.
Avvalroq AQSH prezidenti Jo Bayden Ukrainadagi urush sabab oziq-ovqat inqirozi yuzaga kelishi, bu birinchi navbatda qashshoq davlatlarga ta’sir ko‘rsatishi haqida gapirgandi. Yirik xalqaro tashkilotlar, jumladan, Xalqaro valyuta jamg‘armasi, Jahon banki va Jahon savdo tashkiloti ocharchilikning oldini olish bo‘yicha zudlik bilan chora ko‘rishga chaqirgan edi.
Izoh (0)