Жаҳон банки Россиянинг Украинага бостириб киргани муносабати билан бу йилги глобал иқтисодий ўсиш бўйича тахминларини пасайтирди. Бу ҳақда Bloomberg хабар бермоқда.
Вашингтонда жойлашган ушбу банк ҳозирда дунёда юзага келаётган турли инқирозларни бартараф этиш устида ишлаяпти. Бу учун у COVID-19 оқибатлари учун ажратилганидан кўра кўпроқ маблағ тўпламини сафарбар қилишни режалаштирмоқда.
Биз глобал ўсиш бўйича 2022 йилнинг январь ойидаги тахминларни 4,1 фоиздан 3,2 фоизга туширдик, — деди Жаҳон банки президенти Дэвид Малпасс.
Малпасснинг сўзларига кўра, пасайиш Европа ва Марказий Осиё, жумладан, Россия ва Украина иқтисодинг пасайиши билан боғлиқ. Бу йилги глобал прогноз 2021 йилдаги 5,7 фоиз ўсиш билан таққосланади.
Жаҳон банки раҳбари келгуси ҳафталарда 2022 йил апрелдан 2023 йилнинг июнигача қамраб олинадиган 170 миллиард долларлик инқирозга қарши янги 15 ойлик пакет муҳокамаси бўлишини маълум қилди. Бу сумманинг қарийб 50 миллиард доллари кейинги уч ой ичида ажратилади.
Аввалроқ АҚШ президенти Жо Байден Украинадаги уруш сабаб озиқ-овқат инқирози юзага келиши, бу биринчи навбатда қашшоқ давлатларга таъсир кўрсатиши ҳақида гапирганди. Йирик халқаро ташкилотлар, жумладан, Халқаро валюта жамғармаси, Жаҳон банки ва Жаҳон савдо ташкилоти очарчиликнинг олдини олиш бўйича зудлик билан чора кўришга чақирган эди.
Изоҳ (0)