Toshkent shahrida avtoturargohlar kamaytirilib, jamoat transportlari harakatlanishi uchun kengroq sharoit yaratiladi. Bu haqda 18-aprel kuni AOKAda bo‘lib o‘tgan matbuot anjumanida Toshkent shahar transport tizimini kompleks rivojlantirish loyiha ofisi direktori Murodjon Obidov ma’lum qildi, deya xabar bermoqda “Daryo” muxbiri.
Murodjon Obidovning ta’kidlashicha, poytaxtda yangi “parkovka”lar qurish uchun yer qolmagan.
“Ma’lumki, barcha megapolis shaharlarda transport harakatlanishiga bo‘lgan ehtiyoj oshib borishi bilan, transport soni ham ko‘payib boradi. Markaziy ko‘chalarda transport qo‘yish uchun “parkovka”lar yetishmaydi. Bu katta shaharlar uchun oddiy holat. Biz shahrimiz aholisining transport xizmatlariga bo‘lgan ehtiyojini sifatli qondirish maqsadida jamoat transportini rivojlantirishning ustuvor yo‘nalishlarini belgilab olganmiz. Tizimsiz, tartibsiz bo‘lgan avtoturargohlarni tartibga solish bo‘yicha hamda eng asosiysi, shaxsiy transportda yetib borish mumkin bo‘lgan joylarga jamoat transportini kafolatlangan vaqtda yetib borishi imkoniyatini yaratish ishlari olib borilmoqda.
Bitta narsani to‘g‘ri tushunish kerak — Toshkent shahrida yer bu cheklangan resurs. Ertalabdan kechgacha kimningdir transport vositasi bir joyda turishi, shahar aholisining umumiy foydalanishi uchun bo‘lgan yerni band qilib turadigan holat hisoblanadi. Shuning uchun yer ko‘pchilikka tegishli bo‘lgan hududmi, bu hududga transport kamroq zarar yetkazishi kerak. Ko‘proq tartibsiz qo‘yilgan “parkovka”larni jamoatchilik hududlariga aylantirish masalasi ko‘rib chiqilyapti. Mavjud “parkovka”larni tartibga solamiz”, – dedi mutaxassis.
Murodjon Obidovning qo‘shimcha qilishicha, endilikda shaxsiy transportdan foydalanish o‘rniga, jamoat transportidan foydalanishga kengroq sharoit yaratiladi.
“Shahar markaziy ko‘chalarida 1,5-2 ta polasani band qiladigan avtoturargohlar bor. Toshkent shahrining 10 ta markaziy ko‘chasida eksperiment sifatida yo‘lbo‘yi avtoturargohlarini tartibga soladigan yangi tizim ishlab chiqiladi. Mana shu tizim orqali aholi orqasida shaxsiy transportdan foydalanish o‘rniga, jamoat transportidan foydalanishga targ‘ibot olib boramiz. Chunki Toshkent shahrida yangi “parkovka”lar qurish uchun yer yo‘q! Xorijiy tajribadan xohlagan davlatingizni olib qarang, yerda bitta transport vositasi ertalabdan kechgacha turishi uchun juda katta mablag‘ to‘lash kerak bo‘ladi.
Agar bitta ko‘chani masalan, 100 metr “uchastka”ni band qilib turadigan odamlarda bitta avtobusda kelish imkoniyati bor. Undan keyingi ustuvorlik velotransportga beriladi. Agar hamma yerni yo‘lni “parkovka”larga beraversak, veloyo‘laklarni ham ocha olmaymiz”, – dedi Murodjon Obidov.
Avvalroq 2022-yil davomida Toshkent shahridagi 10 ta ko‘chada avtomobillarning avtomatlashtirilgan yo‘l bo‘yi pullik to‘xtash joylari tashkil etilishi xabar qilingandi. Shuningdek, O‘zbekistonda avtomobil to‘xtash joylari xizmatlarining narxlari bir yilda qanchaga oshgani ma’lum qilingan.
Izoh (0)