Ijtimoiy tarmoqlarda hukumat nomidan turli to‘lovlar va bir martalik nafaqalar ajratilgani haqidagi yolg‘on ma’lumotlar tarqalmoqda. Moliya vazirligi holatga rasmiy munosabat bildirdi.
Ma’lum qilinishicha, Moliya vazirligining barcha rasmiy kanallari rasmiy tekshirilganlik belgisiga (verifikatsiyadan o‘tganini bildiruvchi ko‘k belgi) ega.
“Hurmatli ijtimoiy tarmoqlardagi kanal va guruh adminlari, Moliya vazirligi axborot xizmati nomidan chiqayotgan soxta shaxslarga e’tiborli bo‘lishingizni so‘raymiz”, — deyiladi munosabatda.
Shuningdek, vazirlik barcha qo‘shimcha savollarga @MoliyaPress Telegram manzili hamda (71) 239-15-70 raqamlari orqali aniqlik kiritish mumkinligini eslatib o‘tgan.
Avvalroq Toshkentda O‘zbekiston prezidenti va SSV nomidan feyk xabarlarni tarqatgan 22 yoshli yigit qo‘lga olingani to‘g‘risida xabar berilgandi. Telegram tarmog‘idagi bir qator guruh va kanallarda Sog‘liqni saqlash vazirligi nomidan COVID-19 ga qarshi vaksinatsiyadan o‘tgan fuqarolar bir marotabalik 750 ming so‘m pul mablag‘larini berishga oid feyk xabar tarqatilib, ushbu xabar ostiga biriktirilgan havolaga kirilganida 750 ming so‘mni olish ilinjida bo‘lgan foydalanuvchilardan bank plastik karta rekvizitlari hamda SMS xabarnomada ko‘rsatilgan maxfiy kod-raqam so‘ralayotgani ma’lum bo‘lgandi.
Izoh (0)