Тошкент шаҳрида автотураргоҳлар камайтирилиб, жамоат транспортлари ҳаракатланиши учун кенгроқ шароит яратилади. Бу ҳақда 18 апрель куни АОКАда бўлиб ўтган матбуот анжуманида Тошкент шаҳар транспорт тизимини комплекс ривожлантириш лойиҳа офиси директори Муроджон Обидов маълум қилди, дея хабар бермоқда «Дарё» мухбири.
Муроджон Обидовнинг таъкидлашича, пойтахтда янги «парковка»лар қуриш учун ер қолмаган.
«Маълумки, барча мегаполис шаҳарларда транспорт ҳаракатланишига бўлган эҳтиёж ошиб бориши билан, транспорт сони ҳам кўпайиб боради. Марказий кўчаларда транспорт қўйиш учун «парковка»лар етишмайди. Бу катта шаҳарлар учун оддий ҳолат. Биз шаҳримиз аҳолисининг транспорт хизматларига бўлган эҳтиёжини сифатли қондириш мақсадида жамоат транспортини ривожлантиришнинг устувор йўналишларини белгилаб олганмиз. Тизимсиз, тартибсиз бўлган автотураргоҳларни тартибга солиш бўйича ҳамда энг асосийси, шахсий транспортда етиб бориш мумкин бўлган жойларга жамоат транспортини кафолатланган вақтда етиб бориши имкониятини яратиш ишлари олиб борилмоқда.
Битта нарсани тўғри тушуниш керак — Тошкент шаҳрида ер бу чекланган ресурс. Эрталабдан кечгача кимнингдир транспорт воситаси бир жойда туриши, шаҳар аҳолисининг умумий фойдаланиши учун бўлган ерни банд қилиб турадиган ҳолат ҳисобланади. Шунинг учун ер кўпчиликка тегишли бўлган ҳудудми, бу ҳудудга транспорт камроқ зарар етказиши керак. Кўпроқ тартибсиз қўйилган «парковка»ларни жамоатчилик ҳудудларига айлантириш масаласи кўриб чиқиляпти. Мавжуд «парковка»ларни тартибга соламиз», – деди мутахассис.
Муроджон Обидовнинг қўшимча қилишича, эндиликда шахсий транспортдан фойдаланиш ўрнига, жамоат транспортидан фойдаланишга кенгроқ шароит яратилади.
«Шаҳар марказий кўчаларида 1,5-2 та поласани банд қиладиган автотураргоҳлар бор. Тошкент шаҳрининг 10 та марказий кўчасида эксперимент сифатида йўлбўйи автотураргоҳларини тартибга соладиган янги тизим ишлаб чиқилади. Мана шу тизим орқали аҳоли орқасида шахсий транспортдан фойдаланиш ўрнига, жамоат транспортидан фойдаланишга тарғибот олиб борамиз. Чунки Тошкент шаҳрида янги «парковка»лар қуриш учун ер йўқ! Хорижий тажрибадан хоҳлаган давлатингизни олиб қаранг, ерда битта транспорт воситаси эрталабдан кечгача туриши учун жуда катта маблағ тўлаш керак бўлади.
Агар битта кўчани масалан, 100 метр «участка»ни банд қилиб турадиган одамларда битта автобусда келиш имконияти бор. Ундан кейинги устуворлик велотранспортга берилади. Агар ҳамма ерни йўлни «парковка»ларга бераверсак, велойўлакларни ҳам оча олмаймиз», – деди Муроджон Обидов.
Аввалроқ 2022 йил давомида Тошкент шаҳридаги 10 та кўчада автомобилларнинг автоматлаштирилган йўл бўйи пуллик тўхташ жойлари ташкил этилиши хабар қилинганди. Шунингдек, Ўзбекистонда автомобиль тўхташ жойлари хизматларининг нархлари бир йилда қанчага ошгани маълум қилинган.
Изоҳ (0)