Самарқанд вилоятининг Тойлоқ туманида жойлашган мактабларнинг бирида 50 туп терак ўзбошимчалик билан кесиб ташлангани аниқланди. Бу ҳақда вилоят Экология ва атроф-муҳитни муҳофаза қилиш бошқармаси хабар берди.
Маълум қилинишича, Тойлоқ тумани Халқ таълими бўлимига қарашли 15-умумтаълим мактаби ҳудудидаги 50 туп терак таълим даргоҳининг эҳтиёжларига сарфлаш мақсадида мактаб маъмурияти томонидан кесилган.
Мазкур дарахтларни кесиш учун мактаб директори Ф.Комилов 2022 йилнинг 26 январь куни мактаб ҳудудидаги дарахтларни мақсадли кесиш ва ўрнига янгисини экиш лозимлиги тўғрисида давлат хизматлари орқали мурожаат қилган. Аммо мурожаатга биноан Экоголия бошқармаси томонидан 15 февралдаги жавоб хатига асосан, рад этилгани тўғрисида хулоса хати берилган.
«Ҳолат бўйича қўшимча равишда ўрганишлар олиб борилиб, қатъий чоралар кўрилишини маълум қиламиз», — дейилади муносабатда.
Аввалроқ Сурхондарёда боғча ҳудудидаги 43 туп дарахт ноқонуний кесилгани, Тошкентнинг «Туркистон» саройи олдидаги чинор ва тераклар кесиб ташлангани, Андижонда 25 йиллик дарахтлар ўрнида ихтисослаштирилган мактаб қурилиши, Сирдарёда 170 туп тол дарахти кесиб ташлангани тўғрисида хабар берилганди.
Изоҳ (0)