Март ойида кузатилган ёғингарчиликлар натижасида Ўзбекистон сув омборларида жами 9,46 миллиард куб сув йиғилди. Бу ҳақда сув хўжалиги вазирининг биринчи ўринбосари Азимжон Назаров 18 апрель куни АОКАда ўтказилган матбуот анжуманида маълум қилди, деб хабар берди «Дарё» мухбири.
Азимжон Назаровнинг айтишича, март ойида кузатилган ёғингарчилик жуда катта ёрдам бўлган.
Бугунги кунда, рақамларга тўхталадиган бўлсак, республикамиз сув омборларида жами 9,46 миллиард куб сув йиғилди. Бу 2021 йил билан солиштирадиган бўлсак 663 миллион куб метрга кўп. Лекин кўп йилликка солиштирганда ҳозирги йиғилган сув, ўртача уч йилликка нисбатан оладиган бўлсак, 520 миллион куб кам. Бу ёғингарчиликдан сувни Сурхондарё вилоятидаги Жанубий Сурхон, Тўпаланг сув омборларига, Қашқадарё вилоятидаги Чимқўрғон, Пачкамар, Қамаши сув омборларига, Самарқанд вилоятидаги Каттақўрғон, Оқдарё сув омборларига, Жиззах вилоятидаги Жиззах сув омборига ва Тошкентдаги Оҳангарон, Тошкент сув омборларига йиғиб олдик. Бу орқали ўзига яраша захира яратилди. Лекин бу захира етарли эмас.Шунингдек, Азимжон Назаров қайси вилоятларда сув танқислиги кўпроқ кузатилиши ҳақидаги саволга ҳам жавоб берди.«Ўзгидромет» прогнозлари айтяптики, Амударё ҳавзасида сув кам бўлади, Сурхондарёда 65-70 фоиз, Қашқадарёда 55-65 фоиз бўлиши башорат қилиняпти. Апрель ойининг иккинчи ярми, шунингдек, май ойининг бошида яхшигина ёмғир ёғиши кутилмоқда. Шу ёмғир миқдорининг яхши бўлиши бизга қўшимча шароит яратади, сув омборларимизга сув йиғиб олиш ҳамда ёғган ёмғир орқали қишлоқ хўжалиги экинларини қисман суғоришга ёрдам беради, — дейди у.
«Ҳар бир вилоят, ҳар бир канал қанча миқдорда сув олиши учун лимит қўйилган. Унда қанча сув берилади, қанча ишлатилиши кераклиги кўрсатилган. Сув танқис бўлганда Хоразм ва Қорақалпоғистонга сувни етарлича бера олмаймиз. Лекин вилоятлардаги суғориш тизимининг фойдали иш коэффициенти ҳисобига қайси вилоятларда кўпроқ сув йўқотилишини айтишимиз мумкин. Хоразм вилояти, Қорақалпоғистон Республикасида жуда кўп суғориш тизимлари тупроқ ўзанли. Шунинг учун ҳам биз инвестиция дастурлари доирасида ўша вилоятларга кўпроқ маблағ ажратяпмиз, шу билан бирга, хорижий инвестициялар ҳисобидан ҳам лойиҳалар йўналтирилган», — дейди сув хўжалиги вазирининг биринчи ўринбосари.
Изоҳ (0)