O‘tkir Qodirov boshqa ishga o‘tishi munosabati bilan Davlat bojxona qo‘mitasi raisining o‘rinbosari lavozimidan ozod etildi. Bu haqda Telegram’dagi “Huquqiy axborot” kanali xabar qildi.
Xabarda Qodirovning yangi lavozimi, shuningdek, uning o‘rniga kim tayinlanishi haqida aniq ma’lumot berilmagan.
Ma’lumot uchun, O‘tkir Qodirov 1984-yilda Surxondaryo viloyatida tug‘ilgan. Jahon iqtisodiyoti va diplomatiya universiteti, O‘zbekiston strategik tahlil va istiqbolni belgilash oliy maktabini tugallagan.
O‘tkir Qodirov O‘zbekiston Tashqi ishlar vazirligi, O‘zbekiston Administratsiyasi, O‘zbekiston prezidenti huzuridagi strategik va mintaqalararo tadqiqotlar instituti, O‘zbekiston Tashqi savdo vazirligida mas’ul lavozimlarda faoliyat yuritgan.
2021-yil aprelida Davlat bojxona qo‘mitasi raisi o‘rinbosari lavozimiga tayinlangunga qadar Qishloq xo‘jaligi vazirligi Strategik rivojlantirish va xalqaro hamkorlikni muvofiqlashtirish bosh boshqarmasi boshlig‘i lavozimida ishlagan.
Avvalroq prezidentning tegishli qaror va farmoyishlari bilan Davlat bojxona qo‘mitasi rahbariyati va bir qator hududiy bojxona boshqarmalari rahbariyatida muhim tayinlovlar amalga oshirilgandi. Shuningdek, Monopoliyaga qarshi kurashish qo‘mitasi raisiga yangi o‘rinbosar tayinlangani xabar qilingan.
Izoh (0)