Belarusliklar tomonidan asos solingan EPAM Systems IT kompaniyasi ming nafarga yaqin xodimlarini Rossiya va Belarusdan O‘zbekistonga ko‘chirdi. Bu haqda “Forbes.ru” xabar bermoqda.
Mahalliy tadbirkorlardan biri Forbes’ga mamlakatdagi mehmonxonalar to‘la, Rossiya va Belarusdan O‘zbekistonga ko‘chib kelganlarning 80 foizi “epamovchilar” ekanini aytadi. Prezident Shavkat Mirziyoyevning 14-aprel kuni bo‘lib o‘tgan yig‘ilishida e’lon qilingan ma’lumotlarga ko‘ra, joriy yil boshidan buyon O‘zbekistonga 3 mingga yaqin xorijlik IT mutaxassis kelgan.
EPAM kompaniyasining O‘zbekistondagi filiali 2019-yilda ochilgan, 2021-yil o‘rtalariga kelib unda 150 ga yaqin mutaxassis ishlagan. EPAM ham O‘zbekiston IT parkining rezidenti hisoblanadi. Uning a’zolari bir qator soliq imtiyozlariga ega.
Hozir O‘zbekistonda bo‘lgan EPAM xodimlaridan birining aytishicha, kompaniya ko‘chish jarayonida xodimlarga barcha tarafdan yordam bermoqda. Unga ko‘ra, kompaniya xodim va uning oilasi uchun parvoz, turar joy va kunlik xarajatlarni birinchi oyda to‘laydi.
O‘zbekistondan tashqari, kompaniya xodimlarga yana 10 ga yaqin davlatga ko‘chishni taklif qilmoqda. EPAM xodimlarini ko‘chirish uchun mashhur yo‘nalishlar orasida Gruziya va Armaniston ham bor.
EPAM Rossiyani tark etish qarorini aprel oyining boshida e’lon qildi. Shu bilan birga, kompaniya o‘zining rossiyalik xodimlarini boshqa mamlakatlarga ko‘chirishni allaqachon boshlaganini aytgan.
EPAM Systems 1993-yilda AQSHda belaruslik tadbirkorlar Arkadiy Dobkin va Leonid Lozner tomonidan tashkil etilgan. Bosh qarorgohi Qo‘shma Shtatlarda joylashgan EPAM 40 dan ortiq mamlakatda faoliyat olib boradi.
Kompaniyaning Rossiyada bir nechta vakolatxonalari bor edi. RBK ma’lumotlariga ko‘ra, 2021-yil oxirida Rossiya EPAM’da 6190 kishi ishlagan.
Avvalroq rossiyalik IT mutaxassislar O‘zbekistonga intilayotgani haqida xabar berilgan edi.
Izoh (0)