Toshkent shahridagi “Xalqlar do‘stligi” maydonidagi chorraha o‘tkazuvchanligi va piyodalar xavfsizligi yanada oshiriladi, deb xabar bermoqda shahar hokimligi.
Qayd etilishicha, mashinalarning yuqori o‘tkazuvchanligini va piyodalar xavfsizligini ta’minlash yo‘nalishida “Xalqlar do‘stligi” maydoni oldidagi chorrahada ham ta’mirlash ishlari boshlangan. Bunda yo‘l avtomobillar harakatlanishi uchun yopilmagan holda chorrahaning mashinalarni o‘tkazuvchanligi hozirgidan ko‘ra 70 foizga oshirilishi rejalashtirilgan.
“Ta’mirlash jarayoni kun-u tun olib borilayotgan bo‘lib, tez orada ishlar yakunlanib, haydovchi va piyodalar yangi, zamonaviy chorrahadan foydalanishlari mumkin bo‘ladi. Noqulayliklar uchun uzr so‘raymiz”, — deyiladi xabarda.
Avvalroq ko‘prik qurilishi sabab Toshkentdagi THAY ko‘chasining ayrim yo‘nalishlarida harakat vaqtincha cheklanishi xabar qilingandi. Shuningdek, Toshkent shahar hokimi Jahongir Ortiqxo‘jayev mas’ullarga 10 kun muddatda Toshkentdagi asosiy yo‘llarni ta’mirlash topshirig‘ini bergandi. “Kerak bo‘lsa, kechqurun ishlaysizlar. 10 kundan oshib ketsa, kechirilmaydi. Xato qilishga haqqinglar yo‘q”, — degan shahar hokimi.
Eslatib o‘tamiz, Toshkent shahrida Ramazon oyi kechalaridagi tarovih namozi munosabati bilan har kuni 18:00 dan 00:00 ga qadar masjidlar yaqinidagi yo‘llar transport vositalari harakati uchun berkitiladi.
Izoh (0)