O‘zbekistonda mansabdorlarning sud ishiga aralashuv kuzatilmoqda. Bu haqda 14-aprel kuni AOKAda bo‘lib o‘tgan matbuot anjumanida Oliy sud vakillari ma’lum qildi, deya xabar bermoqda “Daryo” muxbiri.
Oliy sud sudyasi Dilmurod Karimovning aytishicha, mansabdorlar tomonidan sud ishiga aralashish holatlari yo‘q deyish xato.
“Sud ishiga aralashish holatlari yo‘q, desak noto‘g‘ri bo‘ladi. Hayot bo‘lgandan keyin hamma manfaatiga qarab harakatini qiladi. Lekin mansabdor sud ishiga aralashgani bo‘yicha sudya yuqori organlarga xabar berishi kerakligi uning huquqimi yoki majburiyatimi deganda, bu majburiyati bo‘ladi. Ya’ni Sudyalar Oliy kengashi, Oliy sudga yoki sud raisiga sudya xabar berishi shart. Meni ishimga falon odam aralashyapti, deyishi shart. O‘zbekistondagi barcha sudyalar shunday majburiyati borligidan xabardor. Sudya ishiga aralashganlik uchun tegishli tartibda yuqori organlarga ma’lum qilsa, albatta, mansabdorga nisbatan chora ko‘riladi”, — dedi u.
Oliy sud bo‘lim boshlig‘i Sherbek Nazarov sudlar mustaqilligiga aralashganlik bo‘yicha ko‘rilayotgan choralar haqida gapirdi.
“Konstitutsiya, Sudlar to‘g‘risidagi qonunda hamda Jinoyat kodeksida sud mustaqilligiga aralashish uchun normalar belgilangan, ya’ni sud mustaqildir va u qonunga bo‘ysunadi. Uning faoliyatiga aralashganlik javobgarlikka sabab bo‘ladi, deb belgilangan. Bu norma aralashuv holatlari kuzatilgani uchun ham paydo bo‘lgan. Sud mustaqilligiga aralashish bo‘yicha bugungi kunda Sudyalar oliy kengashi tomonidan qat’iy choralar ko‘rib kelinmoqda. Prezident qaroriga asosan, Sudyalar Oliy kengashi har yili sudyalar mustaqilligiga aralashganlik, daxl qilinganlik to‘g‘risida Bosh prokuraturaga jinoyat ishi qo‘zg‘atish bo‘yicha taqdimnoma kiritadi. Yil yakunida O‘zbekiston prezidentiga sudyalar mustaqilligiga aralashilgani yuzasidan axborot kiritish mexanizmi yaratilgan. Sud ishiga aralashgan amaldorlarning nechtasiga chora ko‘rilgani bo‘yicha aniq raqamlar yo‘q. Bu bo‘yicha ishlar yopiq tarzda ko‘rilishidan xabarimiz bor”, — dedi Oliy sud rasmiysi.
Avvalroq sudlar tizimida yagona darcha tamoyili joriy etilishi belgilangani xabar qilingandi. Shuningdek, sud tomonidan 2022-yilning yanvar–mart oylarida 543 ta hokim qarori haqiqiy emas deb topilgani bildirilgan.
Izoh (0)